Tags-Rahbar

nāshād vatan afsos tirī qismat kā sitāra TuuT gayā
uñglī ko pakaḌ kar chalte the jis kī vahī rahbar chhūT gayā

ba-zāhir the rahbar pas-e-parda rahzan
qayādat ko ummīd-vāroñ ne luuTā

haañ dīda-e-tahqīq se ai zauq-e-safar dekh
rahbar jise samjhā hai vo rahzan to nahīñ hai

rahzan haiñ ahl-e-qāfila haiñ aur gard-e-rāh
rahbar ko chhoḌ aa.e haiñ pichhle paḌāv par

vīrān sī ho chalī haiñ rāheñ
rahbar hai na koī rāhzan hai

vahī gum ho gayā raste meñ shāyad
jo rahbar thā jo mīr-e-kārvāñ thā

kitne sāda-lauh haiñ ye sab safīran-e-junūñ
rāhzan bhī mil gayā to us ko rahbar kah diyā

rahbar bhī kare kyā koī da.avā mire aage
ban jaatā hai jañgal meñ bhī rasta mire aage

dasht-e-ulfat meñ rahnumā kaisā
maiñ ne rahbar ko dhar liyā aage

luuTā jo us ne mujh ko to ābād bhī kiyā
ik shaḳhs rahzanī meñ bhī rahbar lagā mujhe

daroġh-goī ko sachchā.ī kā payām kahūñ
jo rāhzan hai use rahbar-e-avām kahūñ

tarīq-e-ishq be-rahbar na ho tai
ki hai ye rah nihāyat pech-dar-pech

kahāñ gum ho gayā hai rāste meñ vo musāfir bhī
na kuchh rahzan batāte haiñ na kuchh rahbar batāte haiñ

jāntā huuñ kaun kyā hai aap kyuuñ deñ mashvara
maiñ luTeroñ se bhī vāqif aur rahbar-āshnā

kal to ḳhair ai rahbar tere saath rahrav the
aaj kis pe hañstī hai gumrahī ḳhudā-ma.alūm

kūche se tere uTh ke bhalā jaa.eñ ham kahāñ
juz naqsh-e-pā hai rahbar-e-mulk-e-adam kahāñ

na sañg-e-mīl na naqsh-e-qadam na rahbar hai
tirī talāsh ne gum kar diyā kahāñ mujh ko

jaane is rah-rav kī nazreñ kaun sī manzil pe hoñ
ek kāñTā sā khaTakte haiñ dil-e-rahbar meñ ham

ye hirs-o-havā kī manzil hai ai rāh-ravo hushyār zarā
jab haath rupahle baḌhte haiñ rahbar ke qadam bik jaate haiñ

nahīñ ye fikr koī rahbar-e-kāmil nahīñ miltā
koī duniyā meñ mānūs-e-mizāj-e-dil nahīñ miltā