Anand Narayan Mulla

mahatma-gandhi ka qatl

Anand Narayan Mulla

Lucknow, Uttar pradesh, India

1901-1997
mashriq kā diyā gul hotā hai maġhrib pe siyāhī chhātī hai
har dil san sā ho jaatā hai har saañs kī lau tharrātī hai
uttar dakhkhin pūrab pachchhim har samt se ik chīḳh aatī hai
nau-e-insāñ kāñdhoñ pe liye gāñdhī kī arthī jaatī hai
ākāsh ke taare bujhte haiñ dhartī se dhuāñ sā uThtā hai
duniyā ko ye lagtā hai jaise sar se koī saayā uThtā hai
kuchh der ko nabz-e-ālam bhī chalte chalte ruk jaatī hai
har mulk kā parcham girtā hai har qaum ko hichkī aatī hai
tahzīb jahāñ tharrātī hai tārīḳh-e-bashar sharmātī hai
maut apne kaTe par ḳhud jaise dil hī dil meñ pachhtātī hai
insāñ vo uThā jis kā saanī sadiyoñ meñ bhī duniyā jan na sakī
mūrat vo miTī naqqāsh se bhī joban ke dobāra ban na sakī
dekhā nahīñ jaatā āñkhoñ se ye manzar-e-ibratnāk-e-vatan
phūloñ ke lahū ke pyāse haiñ apne hī ḳhas-o-ḳhāshāk-e-vatan
hāthoñ se bujhāyā ḳhud apne vo sho.ala-e-rūh pāk-e-vatan
daaġh us se siyah-tar koī nahīñ dāman pe tire ai ḳhāk-e-vatan
paiġhām-e-ajal laa.ī apne us sab se baḌe mohsin ke liye
ai vā.e-tulū-e-āzādī āzād hue us din ke liye
jab nāḳhun-e-hikmat hī TuuTe dushvār ko āsāñ kaun kare
jab ḳhushk huā abr-e-bārāñ hī shāḳhoñ ko gul-afshāñ kaun kare
jab sho.ala-e-mīnā sard ho ḳhud jāmoñ ko farozāñ kaun kare
jab sūraj hī gul ho jaa.e tāroñ meñ charāġhāñ kaun kare
nāshād vatan afsos tirī qismat kā sitāra TuuT gayā
uñglī ko pakaḌ kar chalte the jis kī vahī rahbar chhūT gayā
us husn se kuchh hastī meñ tirī azdād hue the aa ke baham
ik ḳhvāb-o-haqīqat kā sañgam miTTī pe qadam nazroñ meñ iram
ik jism-e-nahīf-o-zār magar ik azm-e-javān-o-mustahkam
chashm-e-bīnā ma.asūm kā dil ḳhurshīd nafas zauq-e-shabnam
vo ijz-e-ġhurūr-e-sultāñ bhī jis ke aage jhuk jaatā thā
vo mom ki jis se Takrā kar lohe ko pasīna aatā thā
siine meñ jo de kāñToñ ko bhī jā us gul kī latāfat kyā kahiye
jo zahar piye amrit kar ke us lab kī halāvat kyā kahiye
jis saañs meñ duniyā jaañ paa.e us saañs kī nik.hat kyā kahiye
jis maut pe hastī naaz kare us maut kī azmat kyā kahiye
ye maut na thī qudrat ne tire sar par rakkhā ik tāj-e-hayāt
thī ziist tirī merāj-e-vafā aur maut tirī merāj-e-hayāt
yaksāñ nazdīk-o-dūr pe thā bārān-e-faiz-e-ām tirā
har dasht-o-chaman har koh-o-daman meñ gūñjā hai paiġhām tirā
har ḳhushk-o-tar hastī pe raqam hai ḳhatt-e-jalī meñ naam tirā
har zarre meñ terā ma.abad har qatra tīrath dhaam tirā
us lutf-o-karam ke aa.iiñ meñ mar kar bhī na kuchh tarmīm huī
is mulk ke kone kone meñ miTTī bhī tirī taqsīm huī
tārīḳh meñ qaumoñ kī ubhre kaise kaise mumtāz bashar
kuchh mulk ke taḳht-nashīñ kuchh taḳht-falak ke tāj-basar
apnoñ ke liye jām-o-sahbā auroñ ke liye shamshīr-o-tabar
nard-e-insāñ Taptī hī rahī duniyā kī bisāt-e-tāqat par
maḳhlūq ḳhudā kī ban ke sipar maidāñ meñ dilāvar ek tū hī
īmāñ ke payambar aa.e bahut insāñ kā payambar ek tū hī
bāzū-e-fardā uḌ uḌ ke thake tirī rif.at tak jā na sake
zehnoñ kī tajallī kaam aa.ī ḳhāke bhī tire haath aa na sake
alfāz-o-ma.anī ḳhatm hue unvāñ bhī tirā apnā na sake
nazroñ ke kañval jal jal ke bujhe parchhā.īñ bhī terī pā na sake
har ilm-o-yaqīñ se bālā-tar tū hai vo sipehr-e-tābinda
suufī kī jahāñ nīchī hai nazar shā.ir kā tasavvur sharminda
pastī-e-siyāsat ko tū ne apne qāmat se rif.at dī
īmāñ kī tañg-ḳhayālī ko insāñ ke ġham kī vus.at dī
har saañs se dars-e-aman diyā har jabr pe dād-e-ulfat dī
qātil ko bhī gar lab hil na sake āñkhoñ se duā-e-rahmat dī
hinsā ko ahinsā kā apnī paiġhām sunāne aayā thā
nafrat kī maarī duniyā meñ ik prem sandesa laayā thā
us prem sandese ko tere sīnoñ kī amānat banñā hai
sīnoñ se kudūrat dhone ko ik mauj-e-nadāmat banñā hai
us mauj ko baḌhte baḌhte phir sailāb-e-mohabbat banñā hai
us sail-e-ravāñ ke dhāre ko is mulk kī qismat banñā hai
jab tak na bahegā ye dhārā shādāb na hogā baaġh tirā
ai ḳhāk-e-vatan dāman se tire Dhulne kā nahīñ ye daaġh tirā
jaate jaate bhī to ham ko ik ziist kā unvāñ de ke gayā
bujhtī huī sham-e-mahfil ko phir sho.ala-e-raqsāñ de ke gayā
bhaTke hue gām-e-insāñ ko phir jāda-e-insāñ de ke gayā
har sāhil-e-zulmat ko apnā mīnār-e-daraḳhshāñ de ke gayā
tū chup hai lekin sadiyoñ tak gūñjegī sadā-e-sāz tirī
duniyā ko añdherī rātoñ meñ Dhāras degī āvāz tirī
Top Urdushayar.com