Tilok Chand Mahroom

hamare waste hai ek jina aur mar jaana

Tilok Chand Mahroom

Mianwali, Punjab, Pakistan

1887-1966
hamāre vāste hai ek jiinā aur mar jaanā
ki ham ne zindagī ko jāda-e-rāh-e-safar jaanā
yakāyak manzil-e-āfāt-e-ālam se guzar jaanā
Dareñ kyuuñ maut se jab hai isī kā naam mar jaanā
tirī nazroñ se gir jaanā tire dil se utar jaanā
ye vo uftād hai jis se bahut achchhā hai mar jaanā
javāb-e-abr-e-naisāñ tujh ko ham ne chashm-e-tar jaanā
ki har ik qatra-e-ashk-e-chakīda ko guhar jaanā
talātum aarzū meñ hai na tūfāñ justujū meñ hai
javānī kā guzar jaanā hai dariyā kā utar jaanā
ham apne rahzan o rahbar the lekin sāda-lauhī se
kisī ko rāhzan samjhe kisī ko rāhbar jaanā
maiñ aise rāh-rau kī justujū meñ mar miTā jis ne
tan-e-ḳhākī ko rāh-e-ishq meñ gard-e-safar jaanā
lab-e-bām aa.e tum aur un ke chehre ho ga.e phīke
qamar ne tum ko ḳhurshīd aur sitāroñ ne qamar jaanā
na bhūlegā hameñ 'mahrūm' sub.h-e-roz-e-mahshar tak
kisī kā maut ke āġhosh meñ vaqt-e-sahar jaanā
Top Urdushayar.com