Tags-Raat

bahā kar le gayā sailāb meñ jo raat kyā kyā
vo dariyā lag rahā hai din meñ kuchh utrā huā sā

pahle us kī āñkheñ sochī jaatī haiñ
phir āñkhoñ meñ raat bitā.ī jaatī haiñ

kaise kaise mile din ko saa.e hameñ
raat ne bhed saare batā.e hameñ

sabr aatā hai judā.ī meñ na ḳhvāb aatā hai
raat aatī hai ilāhī ki azaab aatā hai

raat ko oḌh ke so jaatā huuñ din-bhar kī thakan
sub.h ko phir se ka.ī kaam pahan letā huuñ

har chiiz kī bābat pūchhtī hai jaane kitnī ma.asūm hai ye
haañ is par raat ko sone se mīThī mīThī niiñd aatī hai

agar vo aaj raat hadd-e-iltifāt toḌ de
kabhī phir us se pyaar kā ḳhayāl bhī na aa.egā

mujhe din raat rahtī hai tumhārī justujū ab bhī
tasavvur meñ kiyā kartā huuñ tum se guftugū ab bhī

baat jab thī ki sar-e-shām farozāñ hotā
raat jab ḳhatm huī sub.h kā taarā niklā

jin muñDeroñ se kabūtar jhāñkte the raat din
itnī ūñchī ho ga.ī haiñ dekhte hī Dar lagā

ik raat meñ simaT ga.ī kul umr-e-ārzū
ik umr intizār kiyā aur jal bujhe

ham sūraj chāñd sitāre
haiñ ye din raat hamāre

ham-nashīñ ḳhāmosh dīvāreñ bhī suntī haiñ yahāñ
raat Dhal jaa.e to phir chheḌeñge afsāna koī

ye sard raat ye āvārgī ye niiñd kā bojh
ham apne shahr meñ hote to ghar chale jaate

azāb-e-barq-o-bārāñ thā añdherī raat thī
ravāñ thiiñ kashtiyāñ kis shaan se is jhiil meñ

apne band kamre meñ maiñ pighaltā jaatā huuñ
raat ko nikal aa.ī dhuup kis qayāmat kī

ahl-e-zar nahīñ ham log gahrī niiñd sote haiñ
din hazār lamhoñ kā raat ek saa.at kī

tamām raat jale din ko sard-mehr bane
badan kā shahr bhī shahr-e-anā sā lagtā hai

kañghī se itnī der meñ suljhā.ī ek zulf
ai jaan aadhī raat bakheḌe meñ Dhal ga.ī

andāz tere haal kī sīkhī jo raat ko
teġh-e-hilāl kabk par ai maah chal ga.ī