din utarte hī na.ī shaam pahan letā huuñ
maiñ tirī yādoñ kā ehrām pahan letā huuñ
mere ghar vaale bhī taklīf meñ aa jaate haiñ
maiñ jo kuchh der ko ārām pahan letā huuñ
raat ko oḌh ke so jaatā huuñ din-bhar kī thakan
sub.h ko phir se ka.ī kaam pahan letā huuñ
jab bhī pardes meñ yaad aatā hai ghar kā naqsha
maiñ tasavvur meñ dar-o-bām pahan letā huuñ
ek chāñdī kī añgūThī ke havāle se faqat
apnī uñglī meñ tirā naam pahan letā huuñ
'faiz' yuuñ rakhtā huuñ maiñ us kī mohabbat kā bharam
us ke hisse ke bhī ilzām pahan letā huuñ