Tags-Musafir

bhaTak rahe haiñ ab uḌte hue ġhubār ke saath
musāfir apne sabhī rāstoñ ko chhoḌ chuke

maiñ makīñ huuñ na makāñ shahr-e-mohabbat kā 'zafar'
dil musāfir na kisī ġhair ke ghar jā.egā

na koī ret kā Tiila na sāya-dār daraḳht
rah-e-vafā meñ musāfir kahāñ qayām kareñ

musāfir bhī safar meñ imtihāñ dene se Darte haiñ
mohabbat kyā kareñge vo jo jaañ dene se Darte haiñ

bhaTak rahe haiñ musāfir to rāste gum haiñ
añdherī raat meñ dīpak koī jalā rakhtā

musāfir jis ke rukne kī tavaqqo thī zyāda
na jaane kyuuñ bahut jaldī safar par chal diyā thā

badalte mausamoñ kī dhuul hote rāstoñ ko
thake-hāre musāfir yaad ā.eñge nahīñ kyā

kārvāñ chhoḌ ke vo aayā hai
ik musāfir hai rahbarī apnī

is karb kā aalam to musāfir hī se pūchho
jab shaam guzar jaatī hai aur ghar nahīñ aatā

vo thak kar baiTh jaanā chāhtā thā
musāfir thā Thikāna chāhtā thā

mohabbatoñ kā safar is tarah bhī guzrā thā
shikasta-dil the musāfir shikasta-pā.ī na thī

na sañg-e-mīl na naqsh-e-qadam na bāñg-e-jaras
bhaTak na jaa.eñ musāfir adam kī manzil ke

ham musāfir haiñ mohabbat kī kaThin rāhoñ ke
thak bhī jaate haiñ to karte haiñ basere dil meñ

mire dil, mire musāfir
huā phir se hukm sādir

musāfir-e-ḳhvāb ke liye haiñ ye merī āñkhoñ ke phuul 'sājid'
aur ik sitāre ke dekhne ko ye aag utrī hai sham.a-dāñ se

ruke raheñge fasīl-e-zulmat ke dā.ere par sabhī musāfir
magar kisī ḳhvāb ke jilau meñ charāġh niklegā kārvāñ se

thak ke baiThī hai kahīñ duur musāfir kī tarah
mere ḳhvāboñ se mirī sub.h-e-chaman āḳhir-e-shab

shajar to raah kā saaya haiñ un ko kyā mālūm
kahāñ se aayā musāfir kidhar ravāna huā

jism se saath nibhāne kī mat ummīd rakho
is musāfir ko to raste meñ Thahar jaanā hai

musāfir jā chukā lambe safar par
abhī tak dhuup āñkheñ mal rahī hai