agar vo mil ke bichhaḌne kā hausla rakhtā
to darmiyāñ na muqaddar kā faisla rakhtā
vo mujh ko bhuul chukā ab yaqīn hai varna
vafā nahīñ to jafāoñ kā silsila rakhtā
bhaTak rahe haiñ musāfir to rāste gum haiñ
añdherī raat meñ dīpak koī jalā rakhtā
mahak mahak ke bikhartī haiñ us ke āñgan meñ
vo apne ghar kā darīcha agar khulā rakhtā
agar vo chāñd kī bastī kā rahne vaalā thā
to apne saath sitāroñ kā qāfila rakhtā
jise ḳhabar nahīñ ḳhud apnī zaat kī 'zarrīñ'
vo dūsroñ kā bhalā kis tarah patā rakhtā