Tags-Masti

hoñToñ kī mastī duur kī tū ne khaTā.ī se
lemuu. kī chāshnī hai tirī mīThī baat meñ

mastī meñ un ko lag ga.ī lau aur ġhair kī
denī shab-e-visāl na thī is qadar sharāb

gul meñ aur bulbul meñ kaun jaane kyā guzrī
chashm-posh mastī thī is barahna manzar meñ

kisī kī aañkh meñ mastī to aaj bhī hai vahī
magar kabhī jo hameñ thā ḳhumār jaatā rahā

merī jaañ vo bāda-ḳhvārī yaad hai
vaqt-e-mastī girya-zārī yaad hai

mizāj-e-ahl-e-dil be-kaif-o-mastī rah nahīñ saktā
ki jaise nik.hat-e-gul se pareshānī nahīñ jaatī

jo sar-mastī hai in āñkhoñ meñ pinhāñ
'jalīl' is duḳht-e-raz meñ vo mazā kyā

ab tirā pyaar satā.egā to merī hastī
tirī mastī bharī āvāz meñ Dhal jā.egī

saaqī tirī āñkhoñ meñ haiñ do-jām chhalakte
mai-ḳhāne kī mastī tirī āñkhoñ meñ bharī hai

kahīñ pe ḳhushiyoñ kī bārisheñ haiñ kahīñ pe naġhmāt-e-aish-o-mastī
magar ġharīboñ ke gulshanoñ se ḳhizāñ hī baḌh kar lipaT rahī hai

koī aayā thā dil kī bastī meñ
dil mirā jhūmtā thā mastī meñ

ki ye asar to nahīñ un kī fāqa-mastī kā
phir aaj tañg hue haiñ jo apnī jaan se log

vahshat-o-mastī-o-hairat ke sivā kuchh bhī nahīñ
hai jise us kā pata apnā pata kuchh bhī nahīñ

kaho to de deñ ham aaj tum ko hisāb-e-mastī
ki ham ne jitne bhī jaam uchhāle paḌe hue haiñ

mastī-o-bahs-e-uzr-e-kaffāra
tauba se tauba ham ne kī hī sahī

ik sarāpā surūr-o-bad-mastī
aañkh kyā hai sharāb hai pyāre

bāda-e-ḳhum-e-ḳhāna-e-tauhīd kā mai-nosh huuñ
chuur huuñ mastī meñ aisā be-ḳhud-o-mad.hosh huuñ

rahā daur meñ sāġhar-e-nargisī
mirī mai un āñkhoñ kī mastī rahī

ajab rañg kī mai-parastī rahī
ki be mai piye mai kī mastī rahī

surūr-afzā-o-mastī-ḳhez-o-shorish-āfrīñ hogī
vo bazm-e-sher jis meñ 'vahshat'-e-shevā-bayāñ hogā