Tags-Ada

kyā mastāna har adā hai
kis josh pe hai shabāb tauba

vābasta ho ga.e haiñ ab us kī adā se ham
ham par bhī us ke hukm kā itlāq ho gayā

un kī pahchān kī qīmat to adā karnī thī
jāntā hai koī apnoñ meñ na begānoñ meñ

dekh kar ā.īna kyā kahtā hai yaaro ab vo shoḳh
maah se sad chand behtar haiñ adā-dārī meñ ham

tire jamāl kā partav aziiz hai lekin
tirī adā tirī tasvīr tak nahīñ pahuñchī

be-mehri-e-habīb kā mushkil thā e'tirāf
yāroñ ne us kā naaz o adā naam rakh diyā

vo khoyā khoyā sā un kā aalam laboñ pe halkī sī muskurāhaT
adā ye un kī 'matīn' jaise sunā bhī hai aur sunā nahīñ hai

barq balā yā barq adā ho
donoñ kā hai ek qarīna

kisī ke ḳhvāb se baaqī na bedārī se qaa.em hai
jahān-e-dard bas merī adā-kārī se qaa.em hai

ain-mumkin hai kisī tarz-e-adā meñ aa.e
qissa-e-dard-e-vafā saut-o-sadā meñ aa.e

umr bhar milne nahīñ detī haiñ ab to ranjisheñ
vaqt ham se ruuTh jaane kī adā tak le gayā

ġhamza-o-nāz-o-adā mehr-o-vafā jaur-o-jafā
sab ke sab ḳhāna-bar-andāz nazar aate haiñ

husn kāfir thā adā qātil thī bāteñ sehr thiiñ
aur to sab kuchh thā lekin rasm-e-dildārī na thī

ye barq ye gul aur chamakte hue taare
sab jalve haiñ ye aap ke hañsne kī adā ke

barq-e-jamāl-e-yār ye jalva hai yā hijāb
chashm-e-adā-shanās ko hairāñ banā diyā

kahā thā jo kabhī tum ne chalo dekheñ nazāre ham
usī qātil-adā se ab hamīñ ko kyuuñ satāte haiñ

os meñ Duub ke jis tarah nikhartā hai gulāb
sharm se aur sivā husn adā kā niklā

ka.abe meñ to sidq aur safā ko paayā
but-ḳhāne meñ naaz aur adā ko paayā

azal ke TūTte rishtoñ kī is kashākash meñ
pukār aisī adā se mujhe sunā.ī na de

kis ne ye sikhā.e sab
naaz aur adā tum ko