Tags-Ada

hazār shāḳheñ adā se lachkīñ huā na terā sā loch paidā
shafaq ne kitne hī rañg badle milā na rañg-e-shabāb terā

is tarah rāh-e-ishq meñ sajde adā kiye
merī jabīn-e-shauq jhukī phir uThī nahīñ

ai āftāb ye aalam tirā ġhurūb ke vaqt
sikhā.ī kis ne tujhe ye adā udāsī kī

apnā jo farz hai
is tarah ho adā

hai kis ke lams kī ḳhushbū guloñ meñ
dhanak meñ rañg haiñ kis kī adā ke

ḳhudā ke sāmne aayā kuchh is adā se vo shoḳh
ki muñh se uf bhī zarā dād-ḳhvāh kar na sake

agar hāthoñ se us shīrīñ-adā ke zab.h hoñge ham
to sharbat ke se ghūñT āb-e-dam-e-ḳhanjar meñ āveñge

maiñ Darā nahīñ maiñ dabā nahīñ meñ jhukā nahīñ maiñ bikā nahīñ
magar ahl-e-bazm meñ koī bhī to adā-shanās-e-vafā nahīñ

karūñ naaz qismat pe jitnā bhī kam hai
kanakhiyoñ kī terī adā dekh lī hai

qāfile vāloñ meñ tablīġh-e-safar karte raho
kuchh na kuchh to rahbarī kā haq adā ho jā.egā

ham jānte haiñ ḳhuub adāoñ kī shoḳhiyāñ
ham haiñ adā-shanās Dareñ kyā qazā se ham

nāz-o-adā ko tark mire yaar ne kiyā
ġhamza nayā ye turk sitamgār ne kiyā

haklā ke mujh se baat jo us dil-rubā ne kī
kis husn se adā use takrār ne kiyā

jiinā hai to jiine kī pahlī sī adā māñgo
fir.aun se Takrāo muusā se asā māñgo

abhī aur tez kar le sar-e-ḳhanjar-e-adā ko
mire ḳhuuñ kī hai zarūrat tirī shoḳhi-e-hinā ko

ye bhī shāyad zindagī kī ik adā hai dosto
jis ko sāthī mil gayā vo aur tanhā ho gayā

ġhunche ġhunche meñ hai poshīda salīb-e-ġham-e-dost
kis ne phūloñ meñ ye qātil kī adā rakkhī hai

adā ye kis kaTe patte se tū ne sīkhī hai
sitam havā kā ho aur shāḳh se shikāyat kar

kar ke siñghār aa.e vo aisī adā ke saath
ā.īna un ko dekh kar hairān ho gayā

ḳhudā hai shāhid ki zindagī meñ vo sajda-hā-e-ġham-e-mohabbat
qazā hue the jo gāhe-gāhe ba-shart-e-fursat adā kiye haiñ