Tags-Ada

maar Dālegī ek aalam ko
terī ai shoḳh gar adā hai ye

ham na marte us adā par lekin
paañv par aa ke qazā loT ga.ī

maiñ akelā to nahīñ us kī adā kā mahsūr
kuchh sabab hai ke use saarā zamāna chāhe

sī diye jaa.eñ mire hoñT to ai jān-e-ġhazal
aisā karnā mirī āñkhoñ se adā ho jaanā

zabāñ se ho shukr adā kahāñ tak baḌā hī thā dil-navāz nāvak
kuchh is adā se jigar pe baiThā maza milā yār-e-ham-nashīñ kā

chashm-e-adā-shanās ko hairān kar diyā
husn apnā zarre zarre meñ dikhlā ke yaar ne

tanhā vo aa.eñ jaa.eñ ye hai shaan ke ḳhilāf
aanā hayā ke saath hai jaanā adā ke saath

tirī teġh-e-adā khiñchte hī apnī jaan jaatī hai
qazā se pahle marte haiñ qazā ke jānñe vaale

ġharaz dikhāne ko aan o adā ke sau aalam
vo mujh se paañv dhulātā thā aur maiñ dhotā thā

yaar nazroñ se pare thā aa.ina bhī thā pare
saj-sañvar ke aa ga.ī jān-e-adā ke sāmne

zindagī ham se tire naaz uThā.e na ga.e
saañs lene kī faqat rasm adā karte the

chalo ki DhūñD ke laa.eñ kahīñ se jazb-e-adā
uTho ki rah-guzrān-e-butāñ se kuuch karo

kis mast adā se aañkh laḌī matvālā banā lahrā ke girā
aage to haiñ rāheñ aur kaThin dil pahle hī Thokar khā ke girā

agarche har sarv rāst-qāmat chaman meñ maġhrūr-e-sar-kashī hai
muqābil us qadd-e-ḳhush-adā ke mirī nazar meñ ġhulām dastā

vo mujhe chhoḌ gayā hijr musalle par raat
maiñ adā kartī rahī jis ko namāzoñ kī tarah

is adā kā tirī javāb nahīñ
mehrbānī bhī sargirānī bhī

sar se pā tak supurdagī kī adā
ek andāz-e-turkamānī bhī

sar jaa.e umr bhar kī ho yārab adā namāz
aa.e mirī qazā to paḌhūñ maiñ qazā namāz

mahshar meñ chalte chalte karūñgā adā namāz
paḌh luñgā pul-sirāt pe 'mā.il' qazā namāz

aa.e dahān-e-zaḳhm se āvāz aur aur
is is adā-o-nāz se ḳhanjar lagā.iye