Tags-Hawa

unheñ to ḳhud hī apnī jaan ke laale paḌe haiñ
bechāre shahr vāloñ se havā kyuuñ māñgte ho

aisā bhī ittifāq junūñ meñ huā kabhī
maiñ hañste hañste soch ke kuchh ro paḌā kabhī

mujhe itr-e-hinā kī nahīñ hai havā mujhe phūloñ se hotā hai dāġh-e-sivā
kabhī nik.hat-e-zulf suñghā de sabā tujhe nāfa-e-mushk-e-ḳhatā kī qasam

nazar us kī hai mirī samt abhī mirā dāman-e-goharīñ na dekh
abhī ḳhūn-e-dil hai rukā huā abhī āñsuoñ se ye tar nahīñ

kahīñ shu.ūr meñ sadiyoñ kā ḳhauf zinda thā
maiñ shāḳh-e-asr pe baiThā huā parinda thā

nabard-e-ishq meñ kyā kyā jigar kiyā 'tauqīr'
havā kā lams bhī jab intiqām-e-hiñda thā

zanjīroñ meñ jakḌī us muñh-zor havā ne phir
toḌ diye khiḌkī darvāze par de phaaḌ diye

use bhī os meñ Duubā huā lagā thā badan
mujhe bhī kuchh huā mahsūs raat aisā hī

TuuT kar shāḳh se bikharnā hai
garm lagtī hai ab havā mujh ko

ik din ahmad-'atā' bhī ḳhvāb huā
kah gayā ḳhvāb meñ milūñgā tumheñ

kam huā karte haiñ aise ḳhush-nasīb
tujh pe mar kar jin ko jiinā aa gayā

munhasir chaar anāsir pe hai insāñ kā vajūd
naqsh miTTī kā banā aag havā paanī par

kaun guzrā hai ulajhtā huā maujoñ se 'shabīn'
duur tak kis ke haiñ naqsh-e-kaf-e-pā paanī par

yuuñ bhī huā hai jashn-e-bahārāñ ke naam par
shāḳheñ tarāsh Dālīñ shajar le gayā koī

phir bhī ham log vahāñ jiite haiñ jiine kī tarah
mausam-e-qahr jahāñ Thahrā huā rahtā hai

tund jhoñke kī ragoñ meñ ghol kar apnā dhuāñ
ik diyā andhī havā ko ḳhud-shanāsī de gayā

to motiyoñ meñ na tulne kā rañj ḳhatm huā
kisī kī aañkh ke aañsū ḳharīd laa.e mujhe

ham vahshī the vahshat meñ bhī ghar se kabhī bāhar na rahe
jañgal jañgal phir bhī kitnā naam huā ham logoñ kā

aur to kuchh nuqsān huā ho ḳhvāb meñ yaad nahīñ hai magar
ek sitāra zarb-e-sahar se TuuT gayā ham logoñ kā

ḳhaak kī shohrat dekh ke ham bhī ḳhaak hue the pal bhar ko
phir to ta.āqub kartī rahī ik umr havā ham logoñ kā