nādān dil-fareb mohabbat na khā kabhī
duniyā meñ kis ne kī hai kisī se vafā kabhī
aisā bhī ittifāq junūñ meñ huā kabhī
maiñ hañste hañste soch ke kuchh ro paḌā kabhī
baiThā huuñ is umiid pe ik rahguzār par
le aa.e is taraf tujhe shāyad ḳhudā kabhī
ai dil ye merā husn-e-samā.at na ho kahīñ
tū ne bhī kyā sunī hai vo āvāz-e-pā kabhī
us rashk-e-gul ke saath ga.ī thī ḳhirām ko
phir lauT kar idhar nahīñ aa.ī sabā kabhī
'rif.at' ġhamoñ kī tez havāoñ ke bāvajūd
ham ne charāġh dil kā na bujhne diyā kabhī