Tags-Hawa

kisī muñDer par koī diyā jilā
phir is ke ba.ad kyā huā patā nahīñ

ye ishq bhī ajab ki ek shaḳhs se
mujhe lagā ki ho gayā huā nahīñ

havā gum-sum khaḌī hai rāste meñ
musāfir soch meñ Duubā huā hai

maiñ tamām din kā thakā huā tū tamām shab kā jagā huā
zarā Thahar jā isī moḌ par tere saath shaam guzār luuñ

mo.ajaze kā dar khulā aur ik asā raushan huā
duur gahre pāniyoñ meñ rāsta raushan huā

jaane kitne sūrajoñ kā faiz hāsil hai use
is mukammal raushnī se jo milā raushan huā

aañkh vāloñ ne churā lī raushnī saarī to phir
ek andhe kī hathelī par diyā raushan huā

ek vahshat dā.era-dar-dā.era phirtī rahī
ek sahrā silsila-dar-silsila raushan huā

mustaqil ik be-yaqīnī, ik musalsal intizār
phir achānak ek chehra jā-ba-jā raushan huā

aaj phir jalne lage biite hue kuchh ḳhaas pal
aaj phir ik yaad kā ātish-kada raushan huā

jaane kis aalam meñ likkhī ye ġhazal tum ne 'nabīl'
ḳhāmushī bujhne lagī, shahr-e-sadā raushan huā

ġhubār-e-dil kisī Dhab se na qātil kā huā sābit
ki saaf us kī havā kī teġh mujh se mere kushtan tak

achchhā huā ye vaqt to aanā zarūr thā
muddat se kashmakash meñ dil-e-nā-subūr thā

achchhā huā jo dil kī taḌap aur baḌh ga.ī
jaanā bhī un kī bazm meñ mujh ko zarūr thā

us kūche kī havā thī ki merī hī aah thī
koī to dil kī aag pe pañkhā sā jhal gayā

har gosha-e-ālam meñ zamāne kī sadā huuñ
maiñ vaqt pe chaltā huā naqsh-e-kaf-e-pā huuñ

ik ālam-e-duniyā hai mirī zaat ke andar
maiñ aag bhī miTTī bhī huuñ paanī huuñ havā huuñ

do laḳht huā huuñ maiñ tirī jalvagarī se
aisī hai chakāchaund ki saa.e se judā huuñ

pūchhe hai mirā dil tirī tanhā.ī se kyā kyā
pahlū meñ koī shaḳhs numūdār huā kyā

chal aa ki ham bhī chaleñ paar is adam ke kahīñ
ḳhalā ko ḳhaam banā.eñ havā kashīd kareñ