Tags-Hawa

ai dil kabhī patthar bhī kahīñ mom hue haiñ
jo ḳhvāb meñ dekhā hai kahīñ sach bhī huā hai

nasīhatoñ kā asar ham pe ḳhaak bhī na huā
kisī kī baat na maanī talāsh karte rahe

dil bhī thakan se chuur huā aur dimāġh bhī
aur āsmāñ pe sub.h ke āsār tak nahīñ

dasht kī āb-o-havā ne diyā kāñToñ kā libās
maiñ bahāroñ meñ jo paltā gul-e-ahmar hotā

us ke pahlū se bahut duur mire dil ke qarīb
aisā lagtā hai ki baiThā huā ab bhī koī hai

maut kis raah par khaḌī merī raah dekh rahī hai
abhī abhī maiñ ne havā kī an dekhī chādar meñ sūrāḳh kiyā hai

havā kī halkī sī aahaT pe yuuñ machal jaanā
umīd-e-vasl pe bismil kā phir sambhal jaanā

mansūr sā koī na huā ḳhalq jahāñ meñ
is mamlakat-e-faqr kā sardār vahī hai

kyā koī bhaTkā huā jugnū idhar bhī aa.egā
raat gahrī ho chalī hai raushnī ai raushnī

kaheñ haiñ reḳhta punjab meñ nazar-sāhib
ba-qadr-e-zauq tum un kī suno huā so huā

dekh rahe haiñ ham bhī javānī ke mausam
band havā meñ kaise dupaTTe uḌte haiñ

yuuñ samajh lo ki ba-juz nām-e-ḳhudā kuchh na rahā
jal ke is aag meñ sab ḳhaak huā kuchh na rahā

aaj tak jo bhī huā us ko bhulā denā hai
aaj se tai hai ki dushman ko duā denā hai

khiḌkī kholo kuchh to yahāñ bhī taaza narm havā aa.e
manzar sahn-e-chaman kā ubhre bū-e-dard-rubā aa.e

maiñ aaj phir usī miTTī pe sajda-rez huā
mire ġhurūr kā ye iḳhtitām hai shāyad

dukh aur tarah ke haiñ duā aur tarah kī
aur dāman-e-qātil kī havā aur tarah kī

ham kū-e-malāmat se nikal aa.e to ham ko
raas aa.ī na phir āb-o-havā aur tarah kī

ik havā aa.ī hai dīvār meñ dar karne ko
koī darvāza khulā hai mujhe ghar karne ko

zindagānī ik fareb-e-dā.imī hai sar-ba-sar
mujh pe ye zāhir huā shām-o-sahar ko dekh kar

kabhī kabhī to kuchh aisā bhī ittifāq huā
taḌap ke jaag uThe armāñ to so ga.e alfāz