Tags-Hawa

hai ye sach ki mausam-e-hijr meñ mirā ḳhaar ḳhaar badan huā
kabhī yaad tujh ko jo kar liyā to badan ke ḳhaar chale ga.e

mujh meñ har lamha fuzūñ-tar huā andoh-e-jamāl
aur tasvīr ke mānind sañvartā gayā maiñ

maiñ jal ke raakh huā jis alaao meñ 'āmir'
vo ibtidā meñ sulagtā huā sharāra thā

masjid meñ gar guzar na huā dair hī sahī
bekār baiThe kyuuñ raheñ ik sair hī sahī

ye sochiye ki kyoñ havā pe zor chal nahīñ rahā
kisī bhī ruḳh se aap kā charāġh jal nahīñ rahā

diloñ ke beach meñ dīvār tānne vaalo
khulī havā meñ nikalne kā rāsta rakhnā

diye bujhātī rahī dil bujhā sake to bujhā.e
havā ke sāmne ye imtihān rakhnā hai

dīda-varoñ kī raah par kaun huā hai gāmzan
vo magar apnī zaat se ek misāl de ga.e

tumhāre naam pe maiñ jal-bujhā to ilm huā
ki suud bantā hai kaise ziyāñ banāte hue

maiñ tāza-dam bhī huuñ bechain bhī havā kī tarah
mire qadam se haiñ lipTī rivāyateñ kyā

mujhe chakhte hī kho baiThā vo jannat apne ḳhvāboñ kī
bahut miltā huā thā zindagī se zā.iqa merā

ye maiñ huuñ yā mirā saaya mirā saaya hai yā maiñ huuñ
ajab sī dhund meñ lipTā huā hai hāfiza merā

kaif-o-nashāt-o-sar-ḳhushī nemateñ sab usī kī haiñ
mujh ko atā kiyā huā dard bhī mere rab kā hai

jab zarā tez havā hotī hai
kaisī sunsān fazā hotī hai

dil kā ye haal huā tere baad
jaise vīrān sarā hotī hai

muñh-añdhere kabhī uTh kar dekho
kyā tar o taaza havā hotī hai

ajnabī dhyān kī har mauj ke saath
kis qadar tez havā hotī hai

ka.ī silsiloñ se juḌā huā ye jo zindagī kā safar rahā
na.ī manziloñ kī talāsh meñ ye rahīn-e-rāh-guzar rahā

ajiib ḳhauf kī bastī hai ye diyā hī nahīñ
havā bhī ḳhvāhish-e-dil ko chhipā.e phirtī hai

vo paak havā apne ghar kī pyaar kī jilā apne ghar kī dil meñ samāyā ghar apnā
īsār-e-vafā apne ghar kā vo dard diyā apne ghar kī ruuh pe chhāyā ghar apnā