Tags-Hawa

naddiyāñ bhar ga.iiñ labrez haiñ dariyā saare
hai ye barsāt kī jal-thal ki maiñ royā huā huuñ

jāntā huuñ ki ye hasrat hī mirī manzil hai
shauq kī tishna zamīnoñ meñ jo boyā huā huuñ

dard kā kyā hai mire chhed mujhe pyāre haiñ
maiñ tamannāoñ ke kāñToñ meñ piroyā huā huuñ

chīrtī hai jo sadā maut se sannāTe ko
kyā ye tū hai yā maiñ apne hī se goyā huā huuñ

mere chehre kī daraḳhshānī se māyūs na ho
sirf itnā hai ki ashkoñ se maiñ dhoyā huā huuñ

gasht-e-aflāk kī hājat mujhe kyuuñ kar hogī
maiñ ḳhud apne hī ḳhalāoñ meñ samoyā huā huuñ

'āsim' ab ke jo maiñ Dūbūñ to kuchh aise niklūñ
jaise lafzoñ ke samundar meñ bhigoyā huā huuñ

batāo mujh ko ye kyā huā hai ye kaun sā dard-e-lā-davā hai
ye kyuuñ mirā dam ulajh rahā hai hai ḳhud-baḳhud jī niDhāl kaisā

tamām aalam huā jo shaidā to kuchh ta.ajjub nahīñ hai is kā
but-e-sitamgār tujh ko baḳhshā ḳhudā ne husn-o-jamāl kaisā

vo mehr huuñ maiñ huā jo tāle.a to ik zamāne ne ḳhaak uḌaa.ī
chamakne dete nahīñ haiñ bad meñ uruuj kaisā zavāl kaisā

dāman uThā uThā ke jo bachtā huā chalā
kyuuñ hoveñ mar ke kūche meñ is bevafā ke ḳhaak

saudā-e-ishq yaañ to hai sar meñ bharā huā
nām-e-junūñ se karte haiñ visvās aur log

gunjān huā gesuoñ vāloñ se mohalla
ham-tarz-e-hasīnān-e-avadh shaam hameñ do

huā de kar dabe sho.aloñ ko bhaḌkāyā nahīñ jaatā
dikhā kar jaam mai pyāsoñ ko tarsāyā nahīñ jaatā

na pūchho kab se maiñ shāmil huā huuñ tīra-baḳhtoñ meñ
kisī ke āriz-e-raushan kā jab se til pasand aayā

shaam hai gahrī tez havā hai sar pe khaḌī hai raat
rasta ga.e musāfir kā ab diyā jalā kar dekh

tujhe kyā huā hai āḳhir mujhe kam se kam batā to
tirī saañs tez kyuuñ hai tire haath sard kyuuñ haiñ

kuchh itnā ḳhauf kā maarā huā bhī pyaar na ho
vo e'tibār dilā.e aur e'tibār na ho

havā ḳhilāf ho maujoñ pe iḳhtiyār na ho
ye kaisī zid hai ki dariyā kisī se paar na ho

jo pūchhā havā se kyuuñ mahkī huī ho
kahā us ne aa.ī huuñ ho kar udhar se