Tags-Hawa

ishq huā bīmārī se
āseboñ kā rizq khulā

palkoñ se gire hai ashk Tap Tap
paT se vo lagā huā khaḌā hai

dekh kar 'āzmī' us ko to baḌā ranj huā
vaqt ne kaisī badal Daalī hai sūrat us kī

havā ke saath uḌī hai mohabbatoñ kī mahak
ye tazkire jo mirī jaan kū-ba-kū hue haiñ

maiñ is zamīñ par burīda baazū sisak rahā huuñ
jo uḌ rahā thā havā meñ vo ek par thā merā

tire badan kī masāfat ko tai kiyā to magar
paḌā huā hai abhī tak mirā niDhāl badan

hai bādaloñ ke siyāh ghoḌoñ ke saath varna havā kī parchhā.īñ kis ne dekhī
dhulī dhulī dhuup ke badan par jo chhāñv jaisī subuk-ravī hai vo shā.irī hai

ġhuzashtagānī hai zindagānī na ye havā hai na hai ye paanī faqat ravānī
jo vāqi.ātī hai vo hai qissa jo vāqa.ī hai vo shā.irī

girdāb baḌhā
aur hañsī kā halqa tañg huā

uḌte haiñ havā kī samt zarre
yādoñ ke chale haiñ lāv-lashkar

ye kaun samā rahā hai mujh meñ
baiThā huā chup mirī barābar

dasht-e-vahshat ko faqat qais hī bhāyā huā hai
ham ne bhī ishq kā āzār uThāyā huā hai

sar-kashī mauj-e-havā kii, ye kahāñ samjhegī
kis mashaqqat se diyā ham ne jalāyā huā hai

kaise gulfām kahūñ, kaise sitāra samjhūñ
vo badan aur hī miTTī kā banāyā huā hai

mauj-e-ḳhushbū kī tarah haath na aane vaale
ham ne ik saath bahut vaqt bitāyā huā hai

aap ise kāsa-e-tash.hīr samajh baiThe haiñ
ham ne ik umr se ye zaḳhm chhupāyā huā hai

kaash vo chashm-e-gurezāñ bhī kabhī jaan sake
ham ko kis ḳhvāb kī vahshat ne jagāyā huā hai

mujhe pukāro mujhe sadā do maiñ ek khoyā huā bashar huuñ
shu.ūr meñ lā-shu.ūr kī tarah ek āvāz gūñjtī hai

vo barg-e-ḳhushk jise shāḳh ne latāḌ diyā
havā ke saath na jaa.e to phir kidhar jaa.e

paḌā huā maiñ kisī aa.ine ke ghar meñ huuñ
ye terā shahr hai yā ḳhvāb ke nagar meñ huuñ