Tags-Hawa

har chand apnā haal na ham se bayāñ huā
ye harf-e-be-vajūd magar dāstāñ huā

maanā ki ham pe aaj koī mehrbāñ huā
dil kāñptā hai ye bhī agar imtihāñ huā

jo kuchh maiñ kah chukā huuñ zarā us pe ġhaur kar
jo kuchh bayāñ huā hai ba-mushkil bayāñ huā

ab tum ko jis ḳhulūs kī ham se umiid hai
muddat huī vo nazr-e-dil-e-dostāñ huā

tūfān-e-zindagī meñ zarūrat thī jab tirī
mujh ko har ek mauj pe terā gumāñ huā

ādāb-e-qaid-o-band ne badlā ajiib rañg
kunj-e-qafas kā naam bhī ab āshiyāñ huā

aañsū nikal paḌe haiñ ḳhushī meñ tire huzūr
kis tamkanat ke saath ye dariyā ravāñ huā

tamām raat havā chīḳhtī rahī ban meñ
tamām raat uḌī ḳhaak dil ke āñgan meñ

maiñ us se bhaag ke jā.ūñ bhī to kahāñ jā.ūñ
chhupā huā hai koī roz-o-shab kī chilman meñ

ma.arka ab ke huā bhī to phir aisā hogā
tere dariyā pe mirī pyaas kā pahra hogā

kar lo bāvar koī laayā hai ajā.ib-ghar se
jab kisī jism pe hañstā huā chehrā dekho

guzar rahe haiñ mirī zindagī ke shaam o sahar
ginūñgā baiThā huā daana daana har saa.at

dost ban kar vafā na kī jis ne
huā dushman to mo'tabar niklā

āñkhoñ meñ basā lo ye ubhartā huā sūraj
din Dhalne lagegā to ye manzar na milegā

havā ke sayyāl bāzuoñ par ghaTā ke shab-rañg kārvāñ haiñ
nasīm-e-mastāna raqs meñ hai fazā meñ nashsha sā chhā rahā hai

hamīñ harīf rahe aur hamīñ halīf hue
hamāre ba.ad huā mīr-e-kārvāñ tanhā

maiñ aisā pāgal diyā thā jis ne
havā ko apnā samajh liyā thā

mire rog kā na malāl kar mire chāra-gar
maiñ baḌā huā use paal kar mire chāra-gar

mirī zid se huā hai mehrbāñ dost
mire ehsāñ haiñ dushman par hazāroñ

huā sar ḳham na zer-e-teġh jallād
rahe bojh apnī gardan par hazāroñ