Tags-Hawa

ye rah zarūr tumhāre hī ghar ko jaatī hai
likhā huā hai yahāñ gaam gaam ishq ba-ḳhair

aise phirte haiñ shām-e-tanhā meñ
jaise halkī havā ġhubāre meñ

ab kis se kaheñ aur kaun sune jo haal tumhāre baad huā
is dil kī jhiil sī āñkhoñ meñ ik ḳhvāb bahut barbād huā

ye hijr-havā bhī dushman hai is naam ke saare rañgoñ kī
vo naam jo mere hoñToñ par ḳhushbū kī tarah ābād huā

us shahr meñ kitne chehre the kuchh yaad nahīñ sab bhuul ga.e
ik shaḳhs kitāboñ jaisā thā vo shaḳhs zabānī yaad huā

vo apne gaañv kī galiyāñ thiiñ dil jin meñ nāchtā gaatā thā
ab is se farq nahīñ paḌtā nāshād huā yā shaad huā

benām satā.ish rahtī thī in gahrī sāñvlī āñkhoñ meñ
aisā to kabhī sochā bhī na thā dil ab jitnā bedād huā

kāñTā huā huuñ suukh ke yaañ tak ki ab sunār
kāñTe meñ taulte haiñ mire ustuḳhāñ kā bojh

fasīleñ dil kī girātā huā jo dar aayā
vo koī aur na thā ḳhvāhishoñ kā lashkar thā

ḳhudā ne alaao jalāyā huā hai
use kuchh dikhā.ī nahīñ de rahā hai

bahut duur insān TheThukā huā hai
use ek shola nazar aa rahā hai

ubhāro to zarā shāyad mirā Duubā huā dil ho
koī shai bahr-e-ġham meñ tah-nashīñ ma.alūm hotī hai

ho jaatī hai havā qafas-e-tan se chhaT ke ruuh
kyā said bhāgtā hai rihā ho ke daam se

shor jitnā hai kā.enāt meñ shor
mere andar kī ḳhāmushī se huā

na.ī jagah mujhe mānūs sī lagī to khulā
ye koī ḳhvāb meñ dekhā huā nazāra hai

paidā huā hai ek kī zid ek ḳhalq meñ
izzat hai ġhair kī tū mirī aabrū nahīñ

yahāñ tak aa.ī hai biphre hue lahū kī sadā
hamāre shahr meñ kyā kuchh nahīñ huā hogā

huā hai yuuñ bhī ki ik umr apne ghar na ga.e
ye jānte the koī raah dekhtā hogā

bāzār-e-vaqt se kahāñ jins-e-vafā ga.ī
tanhā hai māh-e-misr kā jaltā huā diyā

asar huā nahīñ us par abhī zamāne kā
ye ḳhvāb-zād hai kirdār kis fasāne kā