Tags-Hawa

har hoñT ko murjhāyā huā phuul samajhiye
har aañkh ko chhalkā huā paimāna kahā jaa.e

milne diyā na us se hameñ jis ḳhayāl ne
sochā to us ḳhayāl se sadma bahut huā

rahbar banā huā hai jo saaya qadam qadam
partav tirā hī mere kahīñ ās-pās hai

suhānī shaam ke mausam meñ kyuuñ udāsī hai
havā udhar se chalī to kahāñ pe Thahregī

jaane kis ko DhūñDne dāḳhil huā hai jism meñ
haDDiyoñ meñ rāsta kartā huā piilā buḳhār

ā.īna tujhe dekh ke gulnār huā thā
shāyad tirī āñkhoñ ne vo rañgat nahīñ dekhī

yuuñ naqsh huā aañkh kī putlī pe vo chehra
phir ham ne kisī aur kī sūrat nahīñ dekhī

band kamroñ kī ghuTan mere liye rahne do
ye jo aatī hai darīchoñ se havā tum rakh lo

charāġh baḳhshe ga.e shahr-e-be-basārat ko
ye kār-e-ḳhair bhī sarzad huā ajab tum se

mire ḳhitāb kī shiddat pe chīḳhne vaalo
tumhāre lahje meñ goyā huā huuñ ab tum se

saudā-e-ishq jab se mujh ko huā hai 'joshish'
ābādī-e-jahāñ ko vīrāna jāntā huuñ

ham to samjhe the ki ham bhuul ga.e haiñ un ko
kyā huā aaj ye kis baat pe ronā aayā

ab ke havā ke saath hai dāman-e-yār muntazir
bānu-e-shab ke haath meñ rakhnā sambhāl kar diyā

dāman-e-qātil jo uḌ uḌ kar havā dene lage
kyā batā.ūñ zaḳhm-e-dil kyā kyā duā dene lage

kyā muḳhālif ho ga.ī ham se zamāne kī havā
'yās' dekho hazrat-e-dil bhī daġhā dene lage

mire ḳhat ko us ne na jab paḌhā mire nāma-bar ko bhī ġham huā
kahā muddatoñ kā jo aasrā thā vo aaj tum ne miTā diyā

lo zuleḳhā ko kab huā hai ishq
kis qadar tāqat-āzmā hai ishq

dekhiye is kā hogā kyā anjām
ab ḳhudā se hameñ huā hai ishq

shajar ke hisse meñ bas rah ga.ī hai tanhā.ī
har ik parinda ravāna huā basere se

jo us kī biin kī dhun par huā hai raqs-andāz
Thanī rahī hai usī saañp kī sapere se