Tags-Hawa

jab sāmnā huā to zabāñ ruk ga.ī mirī
vo bhī nazar jhukā ke bahut sochte rahe

tire āsmān kā sar kabhī kisī aur zamīn pe jhuk gayā
ye huā to aisā huā hī kyuuñ kabhī us kamī kī talāsh kar

vahīñ pe Dūbnā ārām se huā mumkin
jahāñ pe mauj-o-safīne meñ e'tidāl rahā

nazar se gir ke ye dil-e-ġham huā kahīñ na milā
junūñ meñ ḳhaak bhī chhānī galī galī afsos

jis meñ saarā hī shahr dafn huā
faisle sab aTal havā ke rahe

us kī har ik soch meñ hai ik musalsal intishār
is tarah bikhrā huā is dil kā shīrāza na thā

parda paḌā huā thā ḳhudī ne uThā diyā
apnī hī ma.arifat ne tumhārā pata diyā

abhī na ḳhatm huā thā fasāna-e-hastī
gurez karne lage apne darmiyān se log

karte haiñ shauq-e-dīd meñ bāteñ havā se ham
jaate haiñ kū-e-yār meñ pahle sabā se ham

vaqt kī bāzgasht se kab ye huā ki Dar ga.e
dard kī dhuup Dhal ga.ī hijr ke din guzar ga.e

phir ik TuuTā huā rishta phir ik ujḌī huī duniyā
phir ik dilchasp afsāna sunā kar lauT aa.e haiñ

ḳhud meñ jhūmūñ kabhī auroñ ke liye lahrā.ūñ
is se pahle ki havā merā diyā le jaa.e

tirā andāza aisā hai añdheroñ kī kahānī meñ
jalānā kuchh diye bhī aur havā ke saath bhī rahnā

gumāñ huā ki rāsta abhī mirī nazar meñ hai
sharīr shutr-nafs be-mahār kar liyā gayā

tārīk dasht ho gayā āñkhoñ meñ qais kī
pinhāñ huā jo nāqa-e-lailā ġhubār meñ

maiñ bhī kuchh der se baiThā huuñ nishāne pe 'zafar'
aur vo kheñchā huā tiir bhī chal jaanā hai

ye e'timād bhī merā diyā huā hai tujhe
jo mere mashvare be-kār jaane lag ga.e haiñ

to hañs kar lagā kahne kyā ḳhuub kyuuñ
to merā kahāñ kā havā-ḳhvāh hai

tirī galī meñ bhī dār-o-rasan kā charchā hai
badal ga.ī hai havā kis qadar zamāne kī

hazār vādī-e-tārīk se guzartā huā
ye ishq chāhtā hai ho tirā muāsir bas