Tags-Hawa

charāġhoñ meñ añdherā hai añdhere meñ ujāle haiñ
hamāre shahr meñ kaalī havā ne par nikāle haiñ

kuchh nahīñ ishq meñ ba.iid miyāñ
raushnī chhueñ aur havā dekheñ

jaan kī baarī hai ab dil kā ziyāñ aisā na thā
ḳhair jo kuchh bhī huā ham ko gumāñ aisā na thā

rumūz-e-zīst se vāqif huā hai jo insāñ
baqā-e-zīst kī us ko ḳhushī nahīñ hotī

dekhā ho kuchh us āmad-o-shud meñ to maiñ kahūñ
ḳhud gum huā huuñ baat kī tah ab jo pā gayā

ġham jo likkhā huā hai chehre pe
koī paḌh le to us se ranjish kyoñ

chaman meñ āzim-e-holī hai vo basantī-posh
huā hai ġhuncha-e-lālā gulāl kā shīsha

nabī kī aal kā ahvāl sun huā pur-ḳhūñ
'sirāj' dil hai mirā rañg-e-āl kā shīsha

mire dil kī raakh kured mat ise muskurā ke havā na de
ye charāġh phir bhī charāġh hai kahīñ terā haath jalā na de

na.e daur ke na.e ḳhvāb haiñ na.e mausamoñ ke gulāb haiñ
ye mohabbatoñ ke charāġh haiñ inheñ nafratoñ kī havā na de

vahāñ charāġh jalātā huuñ zindagī kā 'ashk'
jahāñ havā ke liye rāsta nahīñ hotā

TukḌe TukḌe dil huā jaatā hai pahlū meñ 'havas'
zab.h kartī hai butāñ kī kam-nigāhī kyā karūñ

makānoñ meñ na.e rauzan banā lo
havā kā ruḳh badaltā jā rahā hai

maiñ musalsal multavī hotā huā
har ghaḌī har gaam tayyāroñ ke beach

huā hai qatl bedārī kā jab se
ye bastī raat din soī paḌī hai

kitnī vahshat hai darmiyān-e-hujūm
jis ko dekho gayā huā hai kahīñ

mil ke har shaḳhs se huā mahsūs
mujh se ye shaḳhs mil chukā hai kahīñ

imkān ho to kar le havā se musālahat
be-fā.eda hai varna koī bādbāñ na khol

bunī haiñ sāzisheñ mausam ne dhuup se mil kar
havā ne mere har ik phuul ko ḳharāshā hai

aur maiñ āhista āhista aage baḌhā
rāhgīroñ se dāman bachātā huā