Tags-Hawa

hosh aatā hai to hotī hai kamāñ apnī taraf
aur phir tiir nikaltā huā rah jaatā hai

tanhā.ī meñ dil kā sahārā ek havā kā jhoñkā thā
vo bhī gayā hai sū-e-bayābāñ us kā aanā mushkil hai

jaise ik ḳhvāb huā ahd-e-guzishta kā sabāt
dam-e-ā.inda mirī aas kā dhokā hī na ho

maiñ ne bachpan guzārā hai apnā yahāñ us ke saa.e meñ pal kar huā maiñ javāñ
kaise bhūlūñ maiñ 'ḳhusrav' ye kachchā makāñ, us makāñ ne mire dil meñ ghar kar liyā

chhabīle mast saaqī ke pichheñ dauḌe sau maḳhmūrāñ
pilāo mai havā ab to huā hai gul-fishānī kā

yaañ havā meñ hai dam-e-īsā kā aalam kyā ajab
paa.e sehat nargis-e-bīmār qiasar-bāġh meñ

raat meñ dhunkā huā sūraj paḌā thā
din meñ 'mājid' dhuup kaalī ho ga.ī hai

jis ko ḳhulūs samjhe hue the vo kyā huā
kitnā yaqīn thā tumheñ dhokā na khāoge

aur apne haq meñ ta.an-e-taġhāful ġhazab huā
ġhairoñ se multafit but-e-ḳhud-kām ho gayā

sharīk-e-hāl huā hai jo faqr-o-fāqa meñ
gaḌhegā saath hī kyā apne mehmāñ apnā

hamārā rañg-e-suḳhan 'yās' koī kyā jaane
sivā.e 'ātish' huā kaun ham-zabāñ apnā

naaz kā maarā huā huuñ maiñ adā kī saugand
kushta-e-jaur-o-jafā huuñ maiñ vafā kī saugand

'zafar' jab se huā tark-e-ta.alluq
hamārī shā.erī rotī rahī hai

jalāne vaale jalāte hī haiñ charāġh āḳhir
ye kyā kahā ki havā tez hai zamāne kī

jo guzrī mujh pe mat us se kaho huā so huā
balā-kashān-e-mohabbat pe jo huā so huā

mabādā ho koī zālim tirā garebāñ-gīr
mire lahū ko tū dāman se dho huā so huā

pahuñch chukā hai sar-e-zaḳhm dil talak yaaro
koī subū koī marham rakho huā so huā

kahe hai sun ke mirī sarguzisht vo be-rahm
ye kaun zikr hai jaane bhī do huā so huā

ḳhudā ke vāste aa darguzar gunah se mire
na hogā phir kabhū ai tund-ḳhū huā so huā