Tags-Hawa

shādāb na.ī rut se hai gulzār-e-adab bhī
phūloñ ko tar-o-tāza havā chāhiye yaaro

achchhā huā ki vaqt se pahle bichhaḌ gayā
barbādiyoñ meñ tū mirī shāmil nahīñ rahā

yaad hai abhī tak vo ek shaam bachpan kī
jaane kyā huā thā sab log ghar ke ro.e the

na jaane hadd-e-nazar se Takrā ke kyuuñ tamannā.ī lauT aa.e
hudūd-e-arz-o-samāñ ke aage khiñchā huā hai hisār shāyad

paḌā hai rañg se aarī bunat se udhḌā huā
guzishta nuqra.ī jhilmil ko ro rahā hogā

kaise tārīḳh farāmosh karegī ham ko
teġh par ḳhuun se likkhā huā inkār haiñ ham

ek muddat se ye manzar nahīñ badlā 'tāriq'
vaqt us paar hai Thahrā huā is paar haiñ ham

kiyā hai ḳhūn-e-tamannā ne surḳh-rū kyā kyā
tamām kaam huā arz-e-nā-tamām ke ba.ad

huā hai kaun se ḳhurshīd-rū se garm itnā
ki mere dil ko jo aisā jalāyā ashk mirā

huā vo jab nazar-andāz yaar kā 'āgāh'
mujhe ye be-asarī par hañsāyā ashk mirā

un kī jannat meñ rahe ham to ye ehsās huā
apne vīrānoñ meñ ham ḳhāk-basar achchhe the

vo bhī kuchh bhūlā huā thā maiñ kuchh bhaTkā huā
raakh meñ chiñgāriyāñ DhūñDī ga.iiñ aisā huā

dāstāneñ hī sunānī haiñ to phir itnā to ho
sunñe vaalā shauq se ye kah uThe phir kyā huā

umr kā Dhalnā kisī ke kaam to aayā chalo
aa.ine kī hairateñ kam ho ga.iiñ achchhā huā

raat aa.ī aur phir tārīḳh ko dohrā ga.ī
yuuñ huā ik ḳhvāb to dekhā magar dekhā huā

vo kisī ko yaad kar ke muskurāyā thā udhar
aur maiñ nādān ye samjhā ki vo merā huā

mabādā shahr kā rasta koī rah-rah na pā le
havā qabroñ kī sham.eñ bhī bujhānā chāhtī hai

aa.ī thī yahāñ zulf-e-girah-gīr kaTā kar
mashriq kī havā bād-e-shumālī kī tarah thī

phirte haiñ misl-e-mauj-e-huā shahr shahr meñ
āvārgī kī lahr hai aur ham haiñ dosto

shām-e-alam Dhalī to chalī dard kī havā
rātoñ kī pichhlā pahr hai aur ham haiñ dosto