Tags-Gham

na huā ilāj-e-ġham-e-ḳhudī kisī barahman se na shaiḳh se
mujhe is balā se bachāne ko jo uThā to pīr-e-muġhāñ uThā

fat.h paa.ī hai sarāboñ pe mire ashkoñ ne
ġham ne bāñdhī hai ka.ī baar nadī raat ga.e

maanā ki har ik tarah ke haa.el ġham haiñ
aa jaao ki phir bazm meñ tanhā ham haiñ

hai kis ke dast-e-karam meñ mahār-e-nāqa-e-jāñ
safar kā lutf ġham-e-ham-safar ne chhīn liyā

band-e-ġham TūTne vaalā hai kisī dam 'partav'
aisā lagtā hai chhalakne ko hai sāġhar merā

uf maiñ kis rah meñ ġham-e-dil kā mudāvā DhūñDūñ
kis taraf jā.ūñ kise dil se lagā.e rakkhūñ

ḳhushī dāman-kashāñ hai dil asīr-e-ġham hai barsoñ se
hamārī zindagī kā ek hī aalam hai barsoñ se

aañsū sho.aloñ meñ Dhal rahe haiñ
ġham dil kī fazā badal rahe haiñ

chup chup sī hai talḳhī-e-zamāna
ġham jām-o-subū meñ Dhal rahe haiñ

marnā hai un ke paañv pe rakh kar sar-e-niyāz
karnā hai aaj qissa-e-ġham muḳhtasar mujhe

siine meñ bujhā jaatā hai dil merā sar-e-shām
is ġham kā ilaaj ātish-e-bāda to nahīñ hai

ġham-e-hayāt kā jhagḌā miTā rahā hai koī
chale bhī aao ki duniyā se jā rahā hai koī

dil dene kī haqīqat ham ḳhuub jānte haiñ
hai ġham kisī kā us ko jo zulf laT rahī hai

ḳhālī nahīñ ḳhalal se 'joshish' ye ḳhaibar-e-dil
din raat mauj ġham kī is se chimaT rahī hai

sar-o-barg-e-ḳhushī ai gul-badan tujh bin kahāñ mujh ko
gulistān-e-dil aayā fauj-e-ġham kī pā.emālī meñ

ye ḳhushī ġham-e-zamāna kā shikār ho na jaa.e
na milo ziyāda ham se kahīñ pyaar ho na jaa.e

na kaTeñ akele dil se ġham-e-zindagī kī rāheñ
jo sharīk-e-fikr-e-daurāñ ġham-e-yār ho na jaa.e

a ġham-e-daurāñ a ġham-e-jānāñ
dil hai ek sitam bahutere

apnī kam-zarfī kā ġham hai aur koī ġham nahīñ
dil se terā ġham na sambhlā mujh ko hai bas ye malāl

ġham-e-ayyām pe yuuñ ḳhush haiñ tire dīvāne
ġham-e-ayyām bhī ik terī adā ho jaise