Tags-Gham

masnad-e-ġham pe jach rahā huuñ maiñ
apnā siina khurach rahā huuñ maiñ

ġham-zada dekh ke hañstā hai zamāna 'ishrāq'
hañsnā paḌtā hai yahāñ ġham ko chhupāne ke liye

fikr rakhte nahīñ haiñ dīvāne
bā.is-e-ġham shu.ūr hotā hai

kashtī-e-mai chalī to ai saaqī
bahr-e-ġham se ubuur hotā hai

betāb kar diyā nigah-e-iltifāt ne
aañsū nikal paḌe unheñ ġham-ḳhvār dekh kar

hasrat-o-yās-o-ārzū shauq kā iqtidā kareñ
kushta-e-ġham kī laash par dhuum se ho namāz-e-ishq

tirī anjuman meñ jo aa.e hue haiñ
ġham-e-do-jahāñ ko bhulā.e hue haiñ

ġham-e-zamāna ne majbūr kar diyā varna
ye aarzū thī ki bas terī aarzū karte

mausam-e-gul phir aane lagā hai
phir vahī ġham satāne lagā hai

ġham meñ Duube hī rahe dam na hamārā niklā
bahr-e-hastī kā bahut duur kinārā niklā

shiddat-e-ġham hī ilāj-e-ġham bhī hotā hai 'kamāl'
baḌhtī haiñ tārīkiyāñ to raushnī paatā huuñ maiñ

ye ātish-e-ishq kī hai jiddat ki dil meñ paidā huī hai riqqat
ye soz-e-ġham kī milī hai lazzat maza hai dil kī jalan ke andar

vo shām-e-ġham jo tirī zindagī kā hāsil hai
vo shaam nūr-e-sahar ke sivā kuchh aur nahīñ

muskurāhaT nahīñ aatī lab-e-sāqī pe 'shamīm'
ġham-e-daurāñ ke liye sub.h-e-najāt aatī hai

badal jā.egā andāz-e-tabā.e daur-e-gardūñ se
na.ī sūrat kī ḳhushiyāñ aur na.e asbāb-e-ġham hoñge

kisī ko is taġhayyur kā na his hogā na ġham hogā
hue jis saaz se paidā usī ke zer-o-bam hoñge

tumheñ is inqilāb-e-dahr kā kyā ġham hai ai 'akbar'
bahut nazdīk haiñ vo din ki tum hoge na ham hoñge

baat karte haiñ ġham-nasīboñ kī
aur baiThe haiñ shah-nashīnoñ meñ

sikka-e-dāġh o zar-e-ġham se bharā hai mirā dil
dekh ḳhālī mirī zambīl nahīñ ho saktī

ġham-e-jahāñ ke taqāze shadīd haiñ varna
junūn-e-kūcha-e-dildār ham bhī rakhte haiñ