Tags-Gham

us par bhī dushmanoñ kā kahīñ saaya paḌ gayā
ġham sā purānā dost bhī āḳhir bichhaḌ gayā

hotā hai asar tum pe kahāñ nāla-e-ġham kā
barham jo huī bazm-e-tarab is kā gilā hai

tā-chand rahegī ye shab-e-ġham kī siyāhī
rasta koī sūraj kā kahīñ rok sakā hai

vo daur hai ki ġham-e-vasl-o-hijr ek taraf
maiñ sochtā huuñ mohabbat kī aabrū hī rahe

garmī se maiñ to ātish-e-ġham kī pighal gayā
rātoñ ko rote rote hī joñ sham-e-gul gayā

rañj-e-ġham khāne ko ḳhudā ne diyā
kyā nahīñ mujh gadā kī jholī meñ

fasīl-e-shukr meñ haiñ sabr ke hisār meñ haiñ
jahāñ guzar nahīñ ġham kā ham us dayār meñ haiñ

haiñ payām-e-āmad-e-shām-e-ġham ruḳh-e-āftāb kī zardiyāñ
ye tamām din to kuchh aur thā magar ab charāġh-e-mazār hai

ye ajab masarrat-e-ishq hai jo ik ashk ban ke Tapak paḌī
ye 'sirāj' merā nasīb hai ki ḳhushī bhī ġham-ba-kanār hai

agar honā paḌe mannat-kash-e-amvāj bhī mujh ko
tū phir merī ḳhudī ko kuchh ġham-e-sāhil nahīñ hotā

kitne ġham haiñ jo sar-e-shām sulag uThte haiñ
chāra-gar tū ne ye kis dukh kī davā bhejī hai

jab mere rāste meñ koī mai-kada paḌā
ik baar apne ġham kī taraf dekhnā paḌā

ġham thā apnī bad-nasībī kā unheñ
der tak kuchh lafz kal royā kiye

ġham bhī ik ne.amat hai lekin dosto
ham use paayā kiye khoyā kiye

aah ai kasrat-e-dāġh-e-ġham-e-ḳhūbāñ ki mudām
safha-e-sīna pur-az-jalva-e-tā.ūsī hai

ġham-e-jānāñ to rāhat-e-dil hai
fikr-e-duniyā azaab hai yaaro

maiñ ab bhī yaad to kartī huuñ āsima us ko
usī kā ġham hai jise maiñ sahār letī huuñ

sharbat kā ghūñT jaan ke piitā huuñ ḳhūn-e-dil
ġham khāte khāte muñh kā maza tak bigaḌ gayā

barq-e-ġham ban ke jo ehsās-e-nazar phūñk ga.ī
is qadar thī tire ik jumla-e-be-bāk meñ aag

kis qadar tash.hīr-e-ġham se duur thā
chupke chupke aah bharte sabz peḌ