Tags-Gham

har ik laġhzish pe phailā.e thā baazū
tirā ġham rabarāna bhī ġhazab thā

kal maiñ ne us ko dekhā to dekhā nahīñ gayā
mujh se bichhaḌ ke vo bhī bahut ġham se chuur thā

taklīf-e-iltifāt na kar ai nigāh-e-nāz
ab mutma.in haiñ apne ġham-e-zindagī se ham

dariyā-e-ġham meñ shahr kā har fard ġharq thā
sāhil ke ās-pās fazā mātamī sī thī

ġham ro ro ke kahtā huuñ kuchh us se agar apnā
to hañs ke vo bole hai ''miyāñ fikr kar apnā''

gar rū-ba-rū us ke kisī ġham-ḳhvār ko chupke
kuchh haal sunātā huuñ maiñ bā-chashm-e-tar apnā

āh-o-zārī se kabhī sāz-e-mohabbat na chhuḌā
ġham kā andāz judā ishq kā andāz judā

mire jīvan se zāhir ho
mire ġham meñ nihāñ ho tum

hazār rāteñ guzar ga.iiñ ik hamāre hī ġham kī shab na guzrī
ujāle ḳhā.if siyah-kade se badal ke rasta nikal rahe haiñ

jab maiñ us aadmī se duur huā
ġham mirī zindagī se duur huā

balliyoñ fart-e-masarrat se uchhal jaatā hai dil
bahr-e-ġham meñ duur se dāmān-e-sāhil dekh kar

shyām gokul na jaanā ki rādhā kā jī ab na bansī kī tānoñ pe lahrā.egā
kis ko fursat ġham-e-zindagī se yahāñ kaun be-vaqt ke raag sun pā.egā

us galī se chalī dard kī rau magar shahr meñ ahl-e-dil haiñ na ahl-e-nazar
jaane kis sar se guzregī ye mauj-e-ḳhūñ jaane kis ghar ye sailāb-e-ġham jā.egā

zulmat-e-ġham se itne hirāsāñ na ho kaun mushkil hai yaaro jo āsāñ na ho
ye garāñ-ḳhvāb lamhe bhī kaT jā.eñge raat Dhal jā.egī din nikal aa.egā

tere ġham ke charāġhoñ kī sad-rañg zau ik kiran de sakegī na ehsās ko
bazm-e-jāñ itnī sunsān ho jā.egī shahr-e-dil itnā vīrān ho jā.egā

ishq ishq ho shāyad husn meñ fanā ho kar
intihā huī ġham kī dil kī ibtidā ho kar

dil hameñ huā hāsil dard meñ fanā ho kar
ishq kā huā āġhāz ġham kī intihā ho kar

kī qazā-e-mubram ne zindagī kī ġham-ḳhvārī
dard kī davā pahuñchī dard be-davā ho kar

honā paḌā hai ḳhūgar-e-ġham bhī ḳhushī kī ḳhair
vo mujh pe mehrbāñ haiñ magar be-ruḳhī ke saath

mire dil kī kalī murjhā rahī hai sarsar-e-ġham señ
karo Tuk muskurā kar baat ai shīrīñ-dahan pyāre