Tags-Dil

bastī meñ kamī kis chiiz kī hai patthar bhī bahut shīshe bhī bahut
is mehr o jafā kī nagrī se dil ke haiñ magar rishte bhī bahut

vo ban kar chāñd tab utrā thā is dil kī zamīñ par
mohabbat kā jab āñkhoñ meñ sitāra hī nahīñ thā

ye ārzueñ ye josh-e-alam ye sail-e-nashāt
ye dil ki hai tapish-e-husn-o-ishq kā sotā

us kisī chiiz pe bhūle se bhī machlā na kare
mere 'daurāñ' dil-e-pur-ḳhūñ ko ye samjhā denā

vo aa ke chal diye haiñ ḳhayāloñ maiñ gum rahā
qadmoñ kī chaap dab ga.ī dil kī sadāoñ meñ

rañg uḌ jaa.e jo minqār-e-anā dil chhū le
hai garāñ gul ko lab-e-mauj-e-sabā kā bosa

jo dil ko diije to dil meñ ḳhush ho kare hai kis kis tarah se halchal
agar na diije to vūhīñ kyā kyā jatāve ḳhafgī itaab akaḌ-bal

jo is bahāne se haath pakḌeñ ki dekh dil kī dhaḌak hamāre
to haath jhap se chhuḌā le kah kar mujhe nahīñ hai kuchh is kī aTkal

kare jo va.ada to is tarah kā ki dil ko sunte hī ho tasallī
jo sochiye phir to kaisā va.ada faqat bahāna fareb aur chhal

ishq ne barbād kar dī zindagī haa.e re ishq
kam huī phir bhī na us kī dil-kashī haa.e re ishq

ek dil āshiq kā hai aur tanz ke sau tiir haiñ
phir bhī hoñToñ par hai us kī ik hañsī haa.e re ishq

kis dil kī raakh juzv-e-rag-e-sañg ho ga.ī
sūraj-mukhī kā phuul khilā hai chaTān par

kaañp uThtā hai dil-e-'maqsūd' ġham ke naam par
maiñ to ik ik dard sah letā huuñ muskāte hue

huā hai taur-e-barbādī jo be-dastūr pahlū meñ
dil-e-betāb ko rahtā hai nā-manzūr pahlū meñ

ajab dil ko lagī hai lau ajab hai nuur pahlū meñ
kiyā hai ishq ne raushan charāġh-e-tūr pahlū meñ

kahā jo maiñ ne mere dil kī ik tasvīr khiñchvā do
mañgā kar rakh diyā ik shīsha chaknāchūr pahlū meñ

ḳhushī ho ho ke ulfat meñ jo bār-e-ġham uThātā hai
dil-e-shaidā hai yā hai ishq kā mazdūr pahlū meñ

havas hai dil ko tere haath se majrūh hone kī
lagā de ik chhurī ai qātil-e-maġhrūr pahlū meñ

taḌap jaatā hai dil terī judā.ī yaad aatī hai
chamak jaatā hai yā-rab kis parī kā nuur pahlū meñ

ilāhī mere us ke vo ham-āġhoshī kī sūrat ho
ki jaise dil kī hai pechīdgī mash.hūr pahlū meñ