Tags-Dil

multafit jab se hai nazar un kī
dil ko dar-pesh hai na.ī uljhan

nikal us kī zulfoñ ke kūche se ai dil
tū paḌhtā qumil-laila illā qalīlā

umr har-chand ki hai barq-e-ḳhirām
dil ke ḳhuuñ karne kī fursat hī sahī

hādse aise bhī guzre ki tasavvur jin kā
dil ko chhū jaa.e to Thokar kī tarah lagtā hai

ho taḌap to dil meñ ġhazal bane ho milan to giit huuñ pyaar ke
haañ ajiib shaḳhs thā 'indirā' jo sikhā ke aise hunar gayā

jab sar-e-shām koī yaad machal jaatī hai
dil ke vīrāne meñ ik sham.a sī jal jaatī hai

siina se siina milā denā to kuchh mushkil nahīñ
yaar mushkil to tire dil se milānā dil kā hai

ye mere dil kī pagDanDī pe chaltī nazm hai koī
ki sail-e-vaqt kī bhaTkī huī ik lahr sā lamha

laḳht-e-dil aa ke musāfir se Thaharte haiñ yahāñ
chashm hai ham se gadāoñ kī guzar kā takiya

garche ham saḳht gunahgār haiñ lekin vallāh
dil meñ jo Dar hai hameñ hai usī Dar kā takiya

ik gul ke murjhāne par kyā gulshan meñ kohrām machā
ik chehra kumhlā jaane se kitne dil nāshād hue

ġham mujhe hasrat mujhe vahshat mujhe saudā mujhe
ek dil de kar ḳhudā ne de diyā kyā kyā mujhe

yaad un kī dil meñ aa.ī vo āsūdgī liye
zulmat meñ aa.e jaise koī raushnī liye

'ejāz' koī chāra-gar-e-ġham na mil sakā
phirtā rahā huuñ dahr meñ dil kī lagī liye

tū aur da.avā ishq kā ye bhī ḳhudā kī shaan hai
mansūr banñe ke liye dil chāhiye ai bul-havas

qaabū meñ jab dil hī nahīñ to kyā kahūñ maiñ dard-e-dil
baḌh kar hai teġh-o-tīr se mere liye merā nafas

na.e ḳhvāboñ ke dil meñ sho.ala-e-ḳhurshīd-e-mahshar hai
zamīr-e-hazrat-e-insāñ kī sultānī nahīñ jaatī

mauj-e-nasīm aaj hai ālūda gard se
dil ḳhaak ho gayā hai kisī be-qarār kā