Tags-Dil

ḳhizāñ meñ kis ne bahāroñ kī dilkashī bhar dī
duā.eñ detā hai dāman kā taar taar kise

kahāñ vo daaġh ki dil kā gumāñ kare koī
samjhiye ahd-e-tamannā kī yādgār kise

ahl-e-ulfat ke liye husn-e-ravāñ hai urdu
ahl-e-dil ke liye dilkash hai javāñ hai urdu

ye bhī ai dil ik fareb-e-vāda-e-fardā na ho
roz suntā huuñ koī mahshar bapā hone ko hai

kuchh aur gumāñ dil meñ na guzre tire kāfir
dam is liye maiñ sūra-e-yūsuf nahīñ kartā

dil faqr kī daulat se mirā itnā ġhanī hai
duniyā ke zar-o-māl pe maiñ tuf nahīñ kartā

tā-sāf kare dil na mai-e-sāf se suufī
kuchh sūd-o-safā ilm-e-tasavvuf nahīñ kartā

dil meñ vahshat jo nahīñ dasht-navardī kaisī
be-ḳhudī chhoḌ ke ab hosh meñ aayā jaa.e

ye dil uThā rahā hai baḌe hausle ke saath
vo baar jo zamīñ se na aflāk se uThā

ishq kā bhī qabīl hotā hai
dard dil kā kafīl hotā hai

tanhā be-chāra sā ye merā dil
tere bin ab aliil hotā hai

nazar ko tuur banā dil ko markaz-e-asrār
ġham-e-alast se aish-e-davām paidā kar

ḳhudā ke naam pe duniyā ko lūTne vaale
ḳhudī kā dil meñ zarā ehtimām paidā kar

tumhāre dil se kudūrat miTā.e to jāneñ
khulā hai shahr meñ ik mahkama safā.ī kā

ye kahāñ se mauj-e-tarab uThī ki malāl dil se nikal ga.e
vahī sub.h-o-shām jo the garāñ nafas-e-bahār meñ Dhal ga.e

ek zarā sā dil hai jis ko toḌ ke bhī tum jā sakte ho
ye sone kā tauq nahīñ ye chāñdī kī dīvār nahīñ hai

mohabbat tez dhuup aur bārishoñ meñ
jo dil vaale haiñ un kā sā.ebāñ hai

is tarah khule dil se iqrār nahīñ karte
rakh lījiye thoḌī sī inkār kī gunjā.ish

dī thī ye duā kis ne mire dil ko ilāhī
ujḌe ye ghar aisā ki phir ābād na hove

dekhā na kisī vaqt maiñ hañste hue us ko
ye bhī koī dil hai jo kabhī shaad na hove