Tags-Dil

jo tīra-shabī ne chhoḌā mujhe to dil se mire uThī ye sadā
ujāle zarā ḳhayāl rahe sahar kabhī shaam ho na sake

dekhe shab-e-firāq meñ koī to ham dikhā.eñ
dil kā vo daaġh chāñd kā TukḌā kaheñ jise

zālim kī aarzū ne jagah lī hai is tarah
dil meñ chhupā huā koī kāñTā kaheñ jise

saqf-e-falak-e-kohna meñ kyā ḳhaak lagā.ūñ
ai zo.af-e-dil is aah kā tham uTh nahīñ saktā

hai jumbish-e-mizhgāñ kā kisī ke jo tasavvur
dil se ḳhalish-e-ḳhār-e-alam uTh nahīñ saktā

dil par hai mire ḳhema-e-har-ābla asnād
kyā kījiye ki ye lashkar-e-ġham uTh nahīñ saktā

havā-e-vahshat dil le uḌī kahāñ se kahāñ
paḌī hai duur zamīñ gard-e-kārvāñ kī tarah

nigāh-e-shauq kī gustāḳhiyoñ kā daur aayā
dil-e-ḳharāb kī nādāniyoñ ke din aa.e

tujh chaal kī qīmat suuñ dil niiñ hai mirā vāqif
ai maan bharī chanchal Tuk bhaav batātī jā

mujh dil ke kabūtar kuuñ bāñdhā hai tirī laT ne
ye kaam dharam kā hai Tuk us ko chhuḌātī jā

tujh neh meñ dil jal jal jogī kī liyā sūrat
yak baar use mohan chhātī suuñ lagātī jā

nigāh ek saḌak hai aur us kī manzil-e-dil
idhar se jaave to ye rāsta zarā sā hai

matā-e-lauh-o-qalam chhin ga.ī to kyā ġham hai
ki ḳhūn-e-dil meñ Dubo lī haiñ uñgliyāñ maiñ ne

ġham-e-insāñ se jo dil sho.ala-ba-jāñ hotā hai
vahī har daur meñ memār-e-jahāñ hotā hai

dil meñ rahrav ke agar azm-e-javāñ hotā hai
gaam bhaTkā bhī to manzil kā nishāñ hotā hai

kaun sā hai ye mohabbat meñ maqām ai 'mullā'
kalma-e-lutf bhī ab dil pe garāñ hotā hai

āsmāñ kā ye qafas qaid kare bhī kaise
dil vo panchhī ki par-o-bāl meñ aatā hī nahīñ

māntā kab hai kisī sūd-o-ziyāñ ko ye dil
aisā vahshī hai kisī chaal meñ aatā hī nahīñ

vo makīn-e-dil huā ḳhurshīd-'akbar'
ghar kā darvāza khulā hone se pahle

dil vo dariyā hai jise mausam bhī kartā hai tabāh
kis tarah ilzām dhar deñ ham kisī tairāk par