Tags-Dil

khāveñge Tāñke zaḳhm-e-sar-o-rū par ai tabīb
par zaḳhm-e-dil to ham se silāyā na jā.egā

yuuñ hī be-ma.anī be-mauqa
nāchne lagtī hai duniyā dil giit sunātā hai

dil kī tārīk sī galiyoñ meñ tumhārī aahaT
aur aahaT se jo ik phuul khilā achchhā thā

log kahte haiñ ki vo shaḳhs burā thā lekin
dil to kahtā hai ki vo shaḳhs baḌā achchhā thā

bujhā hai dil to na samjho ki bujh gayā ġham bhī
ki ab charāġh ke badle charāġh kī lau hai

savāl vaqt kī parchhā.iyoñ se ham bhī kareñ
hamāre dil meñ bhī halkā sā ek partav hai

dil se phir dard mahakne kī sadā.eñ uTTheñ
kaash aisā ho maiñ terī rag-e-jāñ ho jā.ūñ

dil-e-vīrāñ ko ab kī baar shāyad
ġhamoñ ne apnā maskan kar liyā hai

ye ek qatra-e-ḳhūñ markaz-e-do-ālam hai
tumheñ nahīñ hai dil-e-nā-tavāñ kā andāza

apne ahbāb pe karte haiñ dil o jaan nisār
aur aksar unheñ nā-shād bhī ham karte haiñ

ranj-e-ulfat ke sivā ai dil-e-nādān batā
thā koī ranj jise yaad bhī ham karte haiñ

na fikr karnā hamāre dil kī na us junūñ kā malāl rakhnā
ye iltijā hai hamārī tum se tum apne dil ko sambhāl rakhnā

koī sahīfa samajh ke rakkhā tumhāre ḳhat ko chhupā ke dil meñ
mirī mohabbat ko apne dil meñ hamesha tum lā-zavāl rakhnā

tumhī ko chāhā tumhī ko puujā tumhī ko dil meñ sajā ke rakkhā
yahī hai sheva yahī vatīra nazar meñ terā jamāl rakhnā

tum maslahat kaho yā munāfiq kaho mujhe
dil meñ magar ġhubār bahut der tak rahā

aaj bhī naqsh haiñ dil par tirī aahaT ke nishāñ
ham ne us raah se auroñ ko guzarne na diyā

ab us ko dekh ke hī dil ko ḳhauf aatā hai
buland-bām the ham kis qadar kahāñ se gire

dil kā mo.āmla nigah-e-āshnā ke saath
aise hai jaise rābta-e-gul sabā ke saath

ye kyā tilism hai ki sunāyā gayā mujhe
sāz-e-shikast-e-dil tirī āvāz-e-pā ke saath

dil-e-sozān-e-āshiq maḳhzan-e-rañg-e-vafā hogā
vo hissa qadr ke qābil hai jitnā jal gayā hogā