Tags-Dil

dhaḌkan meñ dil kī ḳhud ko jo tashkīl kar gayā
har zāviya nigāh kā tabdīl kar gayā

sochā thā apne dil kā bhī ahvāl kuchh kaheñ
chehra bayān dard kī tafsīl kar gayā

dard-e-dil bhī ġham-e-daurāñ ke barābar se uThā
aag sahrā meñ lagī aur dhuāñ ghar se uThā

havā-e-sub.h-e-dil-āzār itnī tez na chal
charāġh-e-shām-e-ġharībāñ haiñ ham bujhā na hameñ

aap apne ko mo'atabar kar leñ
milne vāloñ ke dil meñ ghar kar leñ

hausla dil kā havādis meñ baḌhā rakkhā hai
sham.a ko maiñ ne havāoñ meñ jalā rakkhā hai

dekh ai husn-e-ḳhud-ārā mire dil kī vus.at
tere ġham ko ġham-e-daurāñ se judā rakkhā hai

sarguzisht-e-dil-e-betāb sunā dī lekin
ġham-gusāroñ se tirā naam chhupā rakkhā hai

jalva dekhoge kahāñ dil ke alāva apnā
mire TuuTe hue ā.īne kī qismat samjho

ye sāz-o-raḳht-e-dil-e-bahra-mand kyā shai hai
tamām bikhre hue dard kā simaT jaanā

ab sunā hai ki mere dil kī tarah
ek sahrā hai māhtāb nahīñ

hārūt saañ zaqan meñ rahā dil tamām raat
guzrī miyāna-e-chah-e-bābil tamām raat

dil kī na pūchho kyā kuchh chāhe dil kā to phailā hai dāman
giit se gaal ġhazal sī āñkheñ sā.ad-e-sīmīñ barg-e-dahan

marhabā sad marhabā jazb-e-vafā kāmil hai aaj
vo adā-e-be-niyāzī ġham-gusār-e-dil hai aaj

apne haq meñ mā.il-e-lutf-o-karam qātil hai aaj
har adā-e-ḳhashmagīñ himmat fazā-e-dil hai aaj

dil meñ kyā kyā havas-e-dīd baḌhā.ī na ga.ī
rū-ba-rū un ke magar aañkh uThā.ī na ga.ī

dil ko thā hausla-e-arz-e-tamannā so unheñ
sarguzisht-e-shab-e-hijrāñ bhī sunā.ī na ga.ī

ġham-e-dūrī ne kashākash to bahut kī lekin
yaad un kī dil-e-'hasrat' se bhulā.ī na ga.ī

vo kaalā chor hai ḳhāl-e-ruḳh-e-yār
ki sau āñkhoñ meñ dil ho to churā le

nahīñ uThtā dil-e-mahzūñ kā mātam
ḳhudā hī is musībat se nikāle