Tags-Dil

mire dard-e-dil kī hī pursish davā
agar mujh ko pūchheñ to achchhā kareñ

ḳhudā be-niyāz aur but sañg-dil
kaho kis se ham raah paidā kareñ

chalo phir kaheñ un se ham hāl-e-dil
yahī phir kaheñge ki ham kyā kareñ

dīda-e-dil se dekhtā huuñ tujhe
sochtā huuñ jab apne maiñ man meñ

apnī sūrat ko ai shahansha-e-husn
'ishq' ke dekh dil ke darpan meñ

na.ī-nikor nirālī par
dil aayā matvālī par

ek chehra jagmagāyā hai sar-e-dasht-e-ḳhayāl
ek sho.ala uTh rahā hai dil se mizhgāñ kī taraf

ye bayābāñ aur us meñ chīḳhtī gaatī havā
un se dil bhar le to jā.ūñ rāh-e-āsāñ kī taraf

kiyā hai ham ne bhī mahsūs 'jyotī' har lamha
tumhāre dil meñ machalte haiñ rañg mausam ke

samā.at meñ abhī tak āhaToñ ke phuul khilte haiñ
koī chaltā hai dil ke darmiyāñ āhista āhista

hairāñ haiñ nigāheñ dil be-ḳhud mahjūb hai husn-e-be-parvā
ab arz-e-tamannā kis se ho ab arz-e-tamannā kaun kare

fitrat hai azal se pābandī kuchh qadr nahīñ āzādī kī
nazroñ meñ haiñ dilkash zanjīreñ ruḳh jānib-e-sahrā kaun kare

raḳht-e-dil bāñdh lo dil-figāro chalo
phir hamīñ qatl ho aa.eñ yaaro chalo

hai inhīñ dhokoñ se dil kī zindagī
jo hasīñ dhokā ho khānā chāhiye

aur kis shai se dāġh-e-dil dho.eñ
kyā kareñ gar na is qadar ro.eñ

dil to patthar banā diyā tū ne
aarzū kis zamīn meñ bo.eñ

dard-e-dil meñ kamī huī hai kahīñ
tum ne pūchhā to kah diyā kam hai

dil-e-barbād ko ābād kiyā hai maiñ ne
aaj muddat meñ tumheñ yaad kiyā hai maiñ ne

talḳhī-e-daur-e-guzishtā kā tasavvur kar ke
dil ko phir mā.il-e-fariyād kiyā hai maiñ ne

toḌā jo phuul bulbul-e-shaidā ke sāmne
kyā tere dil meñ dard kuchh ai bāġhbāñ na thā