Tags-Dil

akelā chhoḌ diyā dhuup meñ safar ke liye
us ek shaḳhs ne jo dil ke sā.ebān meñ thā

ek 'farāz' tumhīñ tanhā ho jo ab tak dukh ke rasiyā ho
varna aksar dil vāloñ ne dard kā rasta chhoḌ diyā hai

na kar 'saudā' tū shikva ham se dil kī be-qarārī kā
mohabbat kis ko detī hai miyāñ ārām duniyā meñ

maiñ chāhūñ bhī to zabt-e-guftugū maiñ lā nahīñ saktā
samajhne par bhī dil kā mudda.ā samjhā nahīñ saktā

bhalā aisī tahī-dāmāñ tamannāoñ se kyā hāsil
bahalne par dil āmāda hai aur bahlā nahīñ saktā

dil ko jis chiiz kī hasrat hai hamīñ jānte haiñ
vo koī chāñd sī sūrat hai hamīñ jānte haiñ

zarā sī aur mahārat ho tīr-zan ko atā
nishāna ab mire dil ke nishāñ se duur nahīñ

maiñ apne dil kā fasāna likhūñ to kyuuñ na likhūñ
ki qissa-goī meñ maiñ 'mopasāñ' se duur nahīñ

us zulf kī gar lail barāt aave mire haat
dil ke mire dāġhoñ kā charāġhān banegā

'uzlat' tū kar us zulf-e-pareshāñ se ye dil jam.a
zunnār kā shīrāza-e-qur.ān banegā

ai shoḳh gulistāñ maiñ nahīñ ye gul-e-rañgīñ
aayā dil-e-sad-chāk mirā rañg badal kar

lab-e-ḳhushk dar-tishnagī-murdagāñ kā
ziyārat-kada huuñ dil-āzurdagāñ kā

hama nā-umīdī hama bad-gumānī
maiñ dil huuñ fareb-e-vafā-ḳhurdagāñ kā

gumrāh ho gayā rah-e-hamvār dekh kar
chalnā thā dil ko jāda-e-dushvār dekh kar

shorīdgi-e-sar ko na thā koī mashġhala
dil ḳhush huā hai raah meñ dīvār dekh kar

dil aur dimāġh donoñ mere ham-safar haiñ aaj
hairat na kījiye merī raftār dekh kar

ye be-gharī ye samundar ye raushnī dil kī
akele baiTh ke sochā kiye haiñ mahfil kī

afsos kisī se miT na sakī insān ke dil kī tishna-labī
shabnam hai ki royā kartī hai bādal haiñ ki barsā karte haiñ

baham ye jam.a hue ḳhuub idhar udhar gustāḳh
ki dil bhī merā hai terī bhī hai nazar gustāḳh

ham apne dil se mohabbat meñ be-ḳhabar na raheñ
ki hai bahut kisī gustāḳh kī nazar gustāḳh