Tags-Dil

chehre pe mohabbateñ sajī thiiñ
dil apnī hī nafratoñ meñ gum thā

hijr kī raat meñ sham-e-shabistāñ had se baḌh kar raushan thī
is hañgām meñ dil bhī jalā ho aisā bhī ho saktā hai

kahāñ nasheman dil kā banā.eñ uljhan bhī hai aur Dar bhī
ḳhud hī shikasta shāḳh-e-vafā ho aisā bhī ho saktā hai

husn-o-ishq kī laag meñ āḳhir kis ko mujrim Thahrā.eñ
dil kā dāman chaak huā ho aisā bhī ho saktā hai

bahr-etamannā se 'rāhī' aa.ī hai sadā-e-ġharqābī
dil kā safīna Duub rahā ho aisā bhī ho saktā hai

kabhī to ishq meñ un ke sadāqat aa hī jā.egī
kabhī to un ke dil meñ merī chāhat aa hī jā.egī

abhī to mere armāñ ḳhuun ke aañsū bahāte haiñ
kabhī to dil ke un zaḳhmoñ ko rāhat aa hī jā.egī

har ek dard rihā ho gayā mire dil se
ki maiñ ne jab bhī tirā hañstā chehra dekhā hai

chhid gayā dil zabāñ talak aate
ham ne jab kī nigah ke tiir kī arz

baḌhā ke pyaas mirī us ne haath chhoḌ diyā
vo kar rahā thā muravvat bhī dil-lagī kī tarah

diye raushan the har jānib añdherā thā magar dil meñ
bahut tanhā thā maiñ lekin sharīk-e-kārvāñ bhī thā

mire har zaḳhm par ik dāstāñ thī us ke zulmoñ kī
mire ḳhūñ-bār dil par us ke hāthoñ kā nishāñ bhī thā

dil le ke muft kahte haiñ kuchh kaam kā nahīñ
ulTī shikāyateñ huiiñ ehsān to gayā

Dartā huuñ dekh kar dil-e-be-ārzū ko maiñ
sunsān ghar ye kyuuñ na ho mehmān to gayā

bazm-e-adū meñ sūrat-e-parvāna dil mirā
go rashk se jalā tire qurbān to gayā

hayāt-e-ishq kī ḳhurshīd-sāmānī nahīñ jaatī
miTā jaatā hai dil zarroñ kī tābānī nahīñ jaatī

mirī sahbā kī azmat sirf ahl-e-dil samajhte haiñ
piye jaatā huuñ lekin pāk-dāmānī nahīñ jaatī

dil kā kyā haal kahūñ sub.h ko jab us but ne
le ke añgḌā.ī kahā naaz se ham jaate haiñ

ummīd kī sham.eñ rah rah kar maiñ dil meñ jalātā jaatā huuñ
jab jal chuktī haiñ ye sham.eñ phir sab ko bujhātā jaatā huuñ

'najmī' ye ḳhamoshī bhī merī kuchh vaj.h-e-sukūn-e-dil na huī
maiñ zabt-e-fuġhāñ se dard ko apne aur baḌhātā jaatā huuñ