Tags-Dil

ye qissa hai dil kā na hogā tamām
abhī aur kitnā sunāne ko hai

daaġh ek ho jilā bhī ḳhuuñ ek ho bahā bhī
ab bahs kyā hai dil se kyā guftugū jigar se

dil kis tarah na khīñcheñ ash.ār reḳhte ke
behtar kyā hai maiñ ne us aib ko hunar se

be-tāqatī ne dil kī āḳhir ko maar rakhā
aafat hamāre jī kī aa.ī hamāre ghar se

dilkash ye manzil āḳhir dekhā to aah niklī
sab yaar jā chuke the aa.e jo ham safar se

bhalā ye kaise maan leñ ki dil ko saaf kar liyā
jo sulh ho ga.ī to phir kalām kyuuñ nahīñ rahā

ḳhāksāroñ kā dil ḳhazīna hai
is zamīñ meñ bhī kuchh dafīna hai

maiñ ne kahā na thā ki yahāñ qadr-e-dil nahīñ
kyuuñ is pe bad-mizāj hai ai ham-shabīh-e-man

muqām-e-be-ḳhabarī hai yahāñ se kitnī duur
ki shahr-e-dil meñ baḌā shor shahryār kā hai

dil-e-ġham-zada pe guzar gayā hai vo hādsa ki mire liye
na to ġham rahā na ḳhushī rahī na junūñ rahā na parī rahī

but-ḳhāna toḌ Dāliye masjid ko Dhā.iye
dil ko na toḌiye ye ḳhudā kā maqām hai

vo sāhib-e-ilm-o-hikmat hoñ yā paikar-e-aql-o-dānā.ī
ik mere dil-e-nādāñ ke sivā sab terī qasam bik jaate haiñ

gar tire dil meñ ho ḳhayāl vasl meñ shauq kā zavāl
mauj muhīt-e-āb meñ maare hai dast-o-pā ki yuuñ

jo muqaddar hai vo anjām-e-tamannā dekheñ
dil-e-vahshat-zada chal aaj use jā dekheñ

dil ye kahtā hai ki husn us kā jahāñ-tāb bhī ho
aur phir ye bhī hai ki ham hī use tanhā dekheñ

ishq-e-but ka.aba-e-dil meñ hai ḳhudāyā jab se
terā ghar bhī mujhe but-ḳhāna nazar aatā hai

sho.ala-e-ishq meñ dekhe koī jalnā dil kā
sham.a ke bhes meñ parvāna nazar aatā hai

un kī mast aañkh mire dil meñ hai raqsāñ 'purnam'
ḳhuub paimāne meñ paimāna nazar aatā hai

ashk aa.e ġham-e-shah se jo chashm-e-tar meñ
dil jalne lagā taḌap taḌap kar bar meñ

dil aa.e na kyuuñ kyuuñ na īmān jaa.e
ye sūrat tumhārī ye ġhamza tumhārā