Tags-Dil

ḳhūñ-nāba-e-dil kī kashīd āḳhir ko tire dam se hai
kahne ko merā mai-kada lekin hai mai-ḳhāna tirā

ab gāyakoñ meñ naam hai varna jo apne giit the
saare dil ke zaḳhm the dar-asl ehsāñ thā tirā

dharī rah ga.ī munsif-e-dil ke aage
bayānoñ kī gaThrī gavāhoñ kī gaThrī

kuchh un ghar se nahīñ kam hamārā ḳhāna-e-dil
jo aadmī kā guzar vaañ nahīñ to yaañ bhī nahīñ

mare miTeñge ham ai dil yahī jo chashmak hai
safā.ī madd-e-nazar vaañ nahīñ to yaañ bhī nahīñ

zaḳhm-e-dil par namak chhiḌak-vāo
zā.iqa mere muñh kā phīkā hai

bosa hoñToñ kā mil gayā kis ko
dil meñ kuchh aaj dard mīThā hai

pahle itnā na parāganda mizāj-e-dil thā
be-sabab hañsnā to be-vajah ḳhafā ho jaanā

sulgā huā hai ziist kā sahrā ufuq ufuq
chehroñ kī dilkashī ga.ī zebā.ī kam huī

ham us se aah soz-e-dil apnā na kah sake
the ātish-e-darūñ se phaphole zabān meñ

ġham khīñchne ko kuchh to tavānā.ī chāhiye
sivayyāñ na dil meñ taab na tāqat hai jaan meñ

ve din ga.e ki ātish-e-ġham dil meñ thī nihāñ
sozish rahe hai ab to har ik ustuḳhvān meñ

dil nazr-o-dīda-pesh-kash ai bā.is-e-hayāt
sach kah ki jī lage hai tirā kis makān meñ

said-e-murġh-e-dil-e-āshiq liye ai dilbar
ḳhaal hai daana aur ye zulf kam az daam nahīñ

dard-e-dil ne hameñ kyā kyā hai chakhā.ī lazzat
is liye dil ko mire ḳhvāhish-e-ārām nahīñ

'aḳhtar' agarche chāroñ taraf tez dhuup thī
dil par ḳhayāl-e-yār kī shabnam paḌī rahī

jo kuchh guzartī hai dil pe pyāre idhar hamāre udhar tumhāre
kaheñ vo kis se adū haiñ saare idhar hamāre udhar tumhāre

ḳhudā dikhā.e jo vasl kī shab ḳhushī se gul-gul shagufta hoñ sab
jo daaġh dil par haiñ ġham ke maare idhar hamāre udhar tumhāre

purānī baat maiñ kal kī samajh ke bhuul gayā
magar hai zaḳhm tamannā-e-dil khulā ab tak

mas.ala husn-e-taḳhyyul kā hai na ilhām kā hai
ye fasāna zarā mushkil dil-e-nākām kā hai