Tags-Dil

jal ga.ī maiñ magar dil jigar kab jale
aañch kī ik kamī sar uThātī rahī

yūñhī uljhī rahne do kyuuñ aafat sar par laate ho
dil kī uljhan baḌhtī hai jab zulfoñ ko suljhāte ho

sunte ho kab baat kisī kī apnī haT par rahte ho
hazrat-e-dil tum apne kiye par āḳhir ko pachhtāte ho

dil se 'asar' kyā kahte ho hai jaan kā saudā ishq-e-butāñ
tum bhī to dīvāne ho dīvāne ko samjhāte ho

tū dil meñ utartī huī ḳhushbū kī tarah hai
maiñ jism se utre hue kapḌe kī tarah huuñ

chalo ik baar phir se ajnabī ban jaa.eñ ham donoñ
na maiñ tum se koī ummīd rakhūñ dil-navāzī kī

kal tak to āñsūon se pareshāñ thā aur ab
ahvāl-e-dil bhī aaj zubūñ mujh ko mil gayā

dil meñ umañg aur irāda koī to ho
be-kaif zindagī meñ tamāshā koī to ho

jahān-e-zulm-o-jafā ke mālik koī na ho ashk-bār kab tak
jo dil hī majbūr ho chukā ho to aañkh par iḳhtiyār kab tak

jo kī kisī ne bhī purshish-e-ġham to chashm-e-majbūr ho ga.ī nam
magar dil-e-zabt-āzmā ke bayān meñ iḳhtisār kab tak

'surūr-ambālvī' apne hī dil meñ us ko paayā hai
jise ik umr tak āvāz dī hai dar-ba-dar maiñ ne

tum ik taraf tumhārī ḳhudā.ī hai ik taraf
hairat-zada hai dil ki kidhar ho kidhar na ho

martā bhalā hai zabt kī tāqat agar na ho
kitnā hī dard-e-dil ho magar chashm-e-tar na ho

vo sar hī kyā ki jis meñ tumhārā na ho ḳhayāl
vo dil hī kyā ki jis meñ tumhārā guzar na ho

maiñ huuñ vo tufta-dil kī huā āftāb par
merā gumāñ ki aah kā merī sharar na ho

hāl-e-dil apnā likhūñ haal tumhārā likkhūñ
tū hī batlā ki tire ḳhat meñ maiñ kyā kyā likkhūñ

naġhma kaisā ki laboñ par bhī hai ik mohar-e-sukūt
dil kī dhaḌkan ke sivā ab koī āvāz nahīñ

aur hī hotī hai ik sāz-e-shikasta kī sadā
soz-e-ġham jis meñ na ho dil kī vo āvāz nahīñ

jab se badlā hai tirā tarz-e-sitam ai zālim
dil-e-bismil ke taḌapne kā vo andāz nahīñ

karvaTeñ lete haiñ naġhmāt-e-mohabbat is meñ
dil kī āvāz se behtar koī āvāz nahīñ