Tags-Dil

maiñ apne āñsuoñ par is liye qaabū nahīñ rakhtā
ki mere dil kī hālat mujh se ye behtar batāte haiñ

unheñ dil kī sadāoñ par bhalā kaise yaqīñ hogā
ye āñkheñ to vahī suntī haiñ jo manzar batāte haiñ

āñkhoñ meñ bhī siine meñ bhī dil meñ bhī tumhīñ ho
kis parde meñ poshīda nahīñ zaat tumhārī

shīrīñ se na ho dil kahīñ farhād kā khaTTā
Dartā huuñ ki shīrīñ hai bahut baat tumhārī

kyā ḳhush-marzī thī logoñ par logāñ jiite marte the
dil vāloñ kī bastī meñ ab qabza hai man-tangoñ kā

apne ḳhalvat-ḳhāna-e-dil se jo nikle to hameñ
sab ke ġham meñ apnā ġham bhī jānñā mushkil huā

dil na chhoTā kījiye nā-qadrī-e-ahbāb par
aib-jūyoñ ko hunar pahchānñā mushkil huā

huī ham se ye nādānī tirī mahfil meñ aa baiThe
zamīñ kī ḳhaak ho kar āsmān se dil lagā baiThe

ab ye beḌā ḳhudā hī paar lagā.e
dil hai aur ġham kī nā-ḳhudā.ī hai

kaise us ko dil kī hālat samjhā.ūñ
baat karūñ to aañkh churāne lagtā hai

vo ashk ai dard-e-dil āñkhoñ meñ hote
jo dāġh-e-ma.asiyat dāman se dhote

jiinā vo kyā ki dil meñ na ho terī aarzū
baaqī hai maut hī dil-e-be-mudda.ā ke ba.ad

zabt karte karte āḳhir phuuT niklī dil kī baat
hañs paḌā gulshan meñ jo bhī ġhuncha-e-ḳhāmosh thā

ishq kā e.ajāz thā ye ishq kī tāsīr bhī
dil se jo naala nikaltā thā sukūn-e-gosh thā

aur kyā dil kī tabāhī pe tavajjoh detā
aap dekheñ mire hoñToñ pe tabassum to nahīñ

hairāñ huuñ dil ko ro.uuñ ki pīTūñ jigar ko maiñ
maqdūr ho to saath rakhūñ nauhagar ko maiñ

pheñke hai vo tīr-e-ġhamza mujh par
samjhe hai ki dil nishāna hai yaañ

yak jumbish-e-shauq dil ko bas hai
kyā hājat-e-tāziyāna hai yaañ

ranjisheñ dil meñ rakhnā burī baat hai kyuuñ na phir ibtidā se mohabbat kareñ
aao pahle sañvāreñ shab-e-ġham ko ham vaqt hogā to ḳhud bhī sañvar jā.eñge

haiñ dil-e-dahr meñ ham sūrat-e-ummīd-e-nihāñ
misl-e-īmāñ ruḳh-e-hastī pe ayaañ rahte haiñ