Tags-Dil

pur-dard jo dil meñ unheñ roko na fuġhāñ se
hote haiñ ye ḳhāmosh to karte haiñ fuġhāñ aur

yārab ye sunā hai vo samajhte nahīñ urdu
de aur dil un ko jo na de mujh ko zabāñ aur

hotā hai fuzūñ yaas meñ soz-e-ġham-e-ulfat
bujhtā hai to hotā hai ye dil shoa.la-fishāñ aur

ba-roz-e-hashr mire saath dil-lagī hī to hai
ki jaise baat koī aap se chhupī hī to hai

vo dil ke saath ulajhtī huī kamān-e-talab
vo ek tiir uchaTtā huā nishāne se

hasrat hī dil meñ kohkan āḳhir ye le gayā
shīrīñ ne apnī āñkhoñ bhī dekhā na rū-e-shīr

milte hī us se dil kī girah mere khul ga.ī
uqde shakar ke jaise khuleñ rū-ba-rū-e-shīr

zahr kī chuTkī hī mil jaa.e barā.e dard-e-dil
kuchh na kuchh to chāhiye baabā davā-e-dard-e-dil

raat ko ārām se huuñ maiñ na din ko chain se
haa.e haa.e vahshat-e-dil haa.e haa.e dard-e-dil

dard-e-dil ne to hameñ behāl kar ke rakh diyā
kaash koī aur ġham hotā bajā.e dard-e-dil

us ne ham se ḳhairiyat pūchhī to ham chup ho ga.e
koī lafzoñ meñ bhalā kaise batā.e dard-e-dil

do balā.eñ aaj kal apnī sharīk-e-hāl haiñ
ik balā-e-dard-e-duniyā ik balā-e-dard-e-dil

zindagī meñ har tarah ke log milte haiñ 'shu.ūr'
āshnā-e-dard-e-dil nā-āshnā-e-dard-e-dil

na ḳhūn-e-dil hai na mai kā ḳhumār āñkhoñ meñ
basī huī hai tumhārī bahār āñkhoñ meñ

har ek aañkh meñ hotī hai muntazir koī aañkh
har ek dil meñ kahīñ kuchh jagah nikaltī hai

ḳhalvat-e-jāñ meñ tirā dard basānā chāhe
dil samundar meñ bhī dīvār uThānā chāhe

parda-dārī ye mohabbat ko nibhānā chāhe
dil meñ chhup kar vo kahāñ sāmne aanā chāhe

haa.e vo rāz-e-ġham ki jo ab tak
tere dil meñ mirī nigāh meñ hai

ajab saudā-e-vahshat hai dil-e-ḳhud-sar meñ rahtā hai
ye kaisī chhab kā mālik hai ye kaise ghar meñ rahtā hai

itne be-mehr mausamoñ meñ bhī us ne had kar dī mehrbānī kī
kiyā mehmān mujh musāfir ko aur phir dil se mezbānī kī