Tags-Dil

shaam ḳhāmosh thī so us ne bhī guftugū se gurez karte hue
jalte jazboñ ko rakkhā āñkhoñ meñ jism se dil kī tarjumānī kī

ab to hālat huī re.āyā sī ab vo tārīḳh kyā kaheñ 'ḳhāvar'
dil kī jo saltanat milī thī hameñ us pe kis kis ne hukmarānī kī

hai jism saḳht magar dil bahut hī nāzuk hai
ki jaise ā.īna mahfūz ik chaTTān meñ hai

ġham hai betāb ki āñkhoñ se nikal jaa.e magar
dil kī daulat kā ḳhasārā bhī nahīñ kar saktā

vo piilī oḌhnī vaalī abhī bhī dil meñ rahtī hai
ye laḌkā kho gayā hai us ke rañg-e-zāfrānī meñ

mahrūmiyoñ ne saath diyā hai tamām umr
ik dard hai ki dil meñ rahā hai tamām umr

yād-e-ḳhudā meñ jī na lagā hai ye aur baat
ḳhauf-e-ḳhudā to dil meñ rahā hai tamām umr

saḳht mushtāq hai tumhārā dil
muñh dikhāo kabhī to ḳhvāb meñ jaan

TukḌe hamāre dil ke paḌe the yahāñ vahāñ
thā pattharoñ se jin ko shaġhaf dekhte rahe

ye do-rāhā hai chalo tum rañg-o-bū kī khoj meñ
ham chale sahrā-e-dil kī bāġhbānī ke liye

zaḳhm-e-dil ab phuul ban kar khil gayā
hāsil-e-ġham aaj mujh ko mil gayā

sar-burīda ḳhasta-sāmāñ dil-shikasta jāñ-ba-lab
āshiqī meñ surḳh-rū nām-e-ḳhudā hone lage

āgahī ne jab dikhā.ī rāh-e-irfān-e-habīb
but the jitne dil meñ sab qibla-numā hone lage

anā sambhālte dil kho diyā hai maiñ ne vahīñ
tumhāre sāmne se vāpsī nahīñ puurī

us ne achchhā hī kiyā haal na pūchhā dil kā
bhaḌak uThtā to ye sho.ala na dabāyā jaatā

uf ye tavāzo.a haa.e ye ḳhātir koī bhalā kis dil se kare
umr tamām jahāñ rahnā thā is ghar mehmāñ aap hue

TukḌe chune haiñ dil ke jo ā.ankhoñ ke ḳhvān haiñ
hai kis ke mehmānī kā ai mardumāñ ye ThaaT

us chashm-o-dil ne kahnā na maanā tamām umr
ham par ḳharābī laa.ī ye ghar hī kī phūT-phāT

mire ash.ār meñ muzmar haiñ lākhoñ dhaḌkaneñ dil kī
maiñ ik duniyā kā ġham dil kī zabānī le ke aayā huuñ

mohabbat naam hai betābī-e-dil ke tasalsul kā
mohabbat kī maiñ 'darshan' ye nishānī le ke aayā huuñ