Tags-Dil

siine meñ bujhā jaatā hai dil merā sar-e-shām
is ġham kā ilaaj ātish-e-bāda to nahīñ hai

ham us ko kaise sunāte kahāniyāñ 'dānish'
kitāb-e-dil kā har ik safha paara paara thā

yahī sabab hai ki ahvāl-e-dil nahīñ kahtā
kahūñ to aur ulajhtī haiñ gutthiyāñ merī

kahīñ tanhā.iyoñ ne vahshatoñ se dostī kar lī
kahīñ dil par guzishta mausamoñ ke ab bhī pahre haiñ

kahīñ barkhā kī rut ne dil kī duniyā ḳhuuñ meñ nahlā dī
kahīñ vīrān rāhoñ par qadam sadiyoñ se Thahre haiñ

hamāre dil pe jo zaḳhmoñ kā baab likkhā hai
isī meñ vaqt kā saarā hisāb likkhā hai

dil dene kī haqīqat ham ḳhuub jānte haiñ
hai ġham kisī kā us ko jo zulf laT rahī hai

ḳhālī nahīñ ḳhalal se 'joshish' ye ḳhaibar-e-dil
din raat mauj ġham kī is se chimaT rahī hai

nahīñ ārām mujh ko iztirāb-e-dil se siine meñ
ki dariyā muztarib hotā hai betābī-e-māhī meñ

sar-o-barg-e-ḳhushī ai gul-badan tujh bin kahāñ mujh ko
gulistān-e-dil aayā fauj-e-ġham kī pā.emālī meñ

dil hai ki abhī dard ke narġhe meñ ghirā hai
chehra hai ki aalam meñ hai aḳhbār mirī jaañ

na kaTeñ akele dil se ġham-e-zindagī kī rāheñ
jo sharīk-e-fikr-e-daurāñ ġham-e-yār ho na jaa.e

isī tarah ḳhūn-e-dil se tū chaman ko sīñchtā jā
ye ḳhizāñ 'shamīm' jab tak ki bahār ho na jaa.e

vo jo shaḳhs apne hī taaḌ meñ so chhupā hai dil hī kī aaḌ meñ
na vo bastī meñ na ujaaḌ meñ na vo jhaaḌ meñ na pahāḌ meñ

are aah tū ne ġhazab kiyā mire dil ko mujh se tuḌā liyā
mirī jī ko le ke jalā diyā paḌī iḳhtilāt ye pahāḌ meñ

mizha par hai pārā-e-dil thañbā vo masal huī hai ab ai ḳhudā
ki daraḳht se jo kabhī girā to vo aTkā un ke hī jhaaḌ meñ

mirī dil meñ nashshe kā hai makāñ mujhe sūjhtī haiñ vo mastiyāñ
ki khajūrī choTiyoñ vāliyāñ paḌī phirtī haiñ mire taaḌ meñ

na kar apnī jaan ko muzmahil are 'inshā' un se lagā na dil
tū digar na hovegā munfa.il kahīñ aa gayā jo latāḌ meñ

dil jaltā hai shaam savere
ek charāġh aur laakh añdhere

a ġham-e-daurāñ a ġham-e-jānāñ
dil hai ek sitam bahutere