Tags-Dil

satyanās ho gayā dil kā
kyā kahūñ us jale kabāb kā rañg

dil ko nasīb ġham kī qayādat nahīñ rahī
ab justajū-e-aish meñ lazzat nahīñ rahī

har lahza makīñ dil meñ tirī yaad rahegī
bastī ye ujaḌne pe bhī ābād rahegī

maiñ dil kā haal usī ko sunātā rahtā huuñ
chhupī na jis se koī baat an-kahī merī

hai zaḳhm-ḳhurda mire dil kā aa.ina aisā
ḳhirad kī teġh se thoḌī sī aab māñge hai

jab se gayā hai vo mirā īmān-e-zindagī
kāfir ho jis ke dil meñ ho armān-e-zindagī

pesh aane lage haiñ nafrat se
bhar gayā un kā dil mohabbat se

dil ko chaskā paḌā hai kuchh aisā
baaz aatā nahīñ mohabbat se

ab tak aisā milā na koī dil kī pyaas bujhātā jo
yuuñ mai-ḳhāna-chashm bahut haiñ bahut haiñ yuuñ to sāqī-lab

dekheñ din phirte haiñ kab tak dekheñ phir kab milte haiñ
dil se dil āñkhoñ se āñkheñ haath se haath aur lab se lab

dil thā dūlhā, duniyā dulhan
pahlī hī ratiyā ho ga.ī an-ban

saath kisī ne chhoḌ kar toḌ diyā kisī kā dil
chal to paḌā thā kārvāñ raah meñ shaam ho ga.ī

maiñ apne dil se nikālūñ ḳhayāl kis kis kā
jo tū nahīñ to koī aur yaad aa.e mujhe

sāmne un ke taḌap kar is tarah fariyād kī
maiñ ne puurī shakl dikhlā dī dil-e-nāshād kī

dil huā majbūr jis dam ashk-e-hasrat ban gayā
ruuh jab taḌpī to sūrat ban ga.ī fariyād kī

zarā zaḳhmoñ pe dil ke aur thoḌī sī namak-pāshī
nikhartā hī nahīñ dekheñ ye husn-e-gulsitāñ kab tak

ā.ankhoñ meñ be-ruḳhī nahīñ dil meñ kashīdgī nahīñ
phir bhī jo dekhiye to ab pahlī sī dostī nahīñ

darūn-e-dil ho ki bairūn-e-dil safar apnā
kahīñ lahad kahīñ ḳhālī makāñ dikhā.ī de

yak-ba-yak ye ho ga.e andāz kyā
phir sunī dil ne vahī āvāz kyā

dair o ka.aba hī pe kyā mauqūf hai
dil nahīñ hai jalva-gāh-e-nāz kyā