hayāt meñ bhī ajal kā samāñ dikhā.ī de
vahī zamīn vahī āsmāñ dikhā.ī de
qadam zamīñ se judā haiñ nazar manāzir se
ġharīb-e-shahr ko shahr āsmāñ dikhā.ī de
tamām shahar meñ be-chehragī kā aalam hai
jise bhī dekhiye gard aur dhuāñ dikhā.ī de
ik ek shaḳhs hujūm-e-ravāñ meñ tanhā hai
ik ek shaḳhs hujūm-e-ravāñ dikhā.ī de
kabhī suno to makīnoñ kā girya-e-saharī
lahūluhān sā ek ik makāñ dikhā.ī de
makīñ huuñ maiñ ki musāfir ye dasht hai ki dayār
qayām meñ bhī safar kā samāñ dikhā.ī de
darūn-e-dil ho ki bairūn-e-dil safar apnā
kahīñ lahad kahīñ ḳhālī makāñ dikhā.ī de
vo dhuup hai ki sulagtā hai saaya paaoñ tale
ḳhamīr-e-ḳhāk bhī aag aur dhuāñ dikhā.ī de
hai jism sho.ala hī sho.ala to jaañ hai pyaas hī pyaas
aur apnā saaya sarāb-e-tapāñ dikhā.ī de
maiñ kis taraf ko baḌhūñ āsmān hai na zamīñ
maiñ jis taraf bhī chalūñ ḳhauf-e-jāñ dikhā.ī de
zamīn hai ki falak paañv kis jagah haiñ nadīm!
mujhe batā, mujhe sab kuchh dhuāñ dikhā.ī de
sab apne dard ke dozaḳh meñ jal rahe haiñ 'shahāb'
magar zamīñ hameñ jannat-nishāñ dikhā.ī de