Tags-Dil

vahshat meñ qaid-e-dair-o-haram dil se uTh ga.ī
haqqā ki mujh ko ishq ne rastā batā diyā

ishq se dil ko uubā dekhā
jism kā jab se saudā dekhā

muddatoñ meñ aaj dil ne faisla āḳhir diyā
ḳhūb-sūrat hī sahī lekin ye duniyā jhuuT hai

haa.e phūloñ ke muqaddar pe bhī dil rotā hai
zindagī un kī bhī kāñToñ meñ basar hotī hai

ḳhuub lagtī hai tire chīra-e-nukdār kī saj
jis tarah dil meñ chubhī hai so batānāñ mushkil

phir baḌe zor se darvāza koī band huā
phir kahā dil ne abhī ā.eñge aane vaale

dil ki jis par haiñ naqsh-e-rañgā-rañg
us ko saada kitāb honā thā

dil ke ujḌe hue mandir ko basāne ke liye
le ke aa.ī thiiñ kisī yaad kī mash.al rūheñ

masnad-e-matlab-e-dil par mire kar mohr-e-qubūl
mansab-e-lutf kā mañgtā huuñ bahālī ai shoḳh

bas ki tasvīr tirī naqsh kiyā dil meñ 'sirāj'
parda-e-chashm hai fānūs-e-ḳhayālī ai shoḳh

churātā hai badan mujh se nigāheñ
mujhe dil bhī safā.ī de rahā hai

dil-figārī ke sanam-ḳhāne meñ
dil-navāzī kā chalan laa.e haiñ

ḳhudā mire dil-e-pur-ḳhūñ ko dāġh-dār kare
jo lāla-zār mirī ḳhaak se bahār kare

murād-e-dil hai yahī ārzu-e-dil hai yahī
ḳhudā mujhe tirī ulfat se ishtihār kare

banā hai shīsha-e-sā.at mirā dil-e-nāzuk
ġhubār-e-ḳhātir-e-yārāñ kā tā shumār kare

hai dil meñ ḳhayāl-e-gul-e-ruḳhsār kisī kā
dāġhoñ siiñ mohabbat ke hai gulzār kisī kā

sab par hai karam mujh pe sitam kyā hai do-rañgī
dildār kisī kā hai dil-āzār kisī kā

laatī hai ḳhabar yaar kī mauj-e-dam-e-shamshīr
kaarī hai magar dil meñ mire vaar kisī kā

maze vo paa.e haiñ aarzū meñ ki dil kī ye aarzū hai yārab
tamām duniyā kī ārzūeñ mire liye intiḳhāb kar de

maiñ jān-o-dil se tasavvur-e-husn-e-dost kī mastiyoñ ke qurbāñ
jo ik nazar meñ kisī ke be-kaif āñsuoñ ko sharāb kar de