Tags-Dil

taskīn-e-dil-e-mahzūñ na huī vo sa.i-e-karam farmā bhī ga.e
is sa.i-e-karam ko kyā kahiye bahlā bhī ga.e taḌpā bhī ga.e

ham bhī achchhe haiñ dard bhī kam hai
dil se uTThā magar dhuāñ sā kyā

ek dhundlā sā tasavvur hai ki dil bhī thā yahāñ
ab to siine meñ faqat ik Tiis sī paatā huuñ maiñ

'hashr' merī sher-goī hai faqat fariyād-e-shauq
apnā ġham dil kī zabāñ meñ dil ko samjhātā huuñ maiñ

yūñhī jo karte raheñge mushāhida dil kā
chamak uThegā kisī roz aa.ina dil kā

hamārī raah meñ dīvār uThā ke duniyā ne
qadam qadam pe baḌhāyā hai hausla dil kā

maqām aisā bhī aatā hai rāh-e-ulfat meñ
qubūl aql bhī kartī hai mashvara dil kā

bhaTak na jaa.e kahīñ dhaḌkanoñ ke jañgal meñ
dimāġh DhūñDne niklā hai rāsta dil kā

ye hichkiyoñ kā tasalsul bilā-sabab to nahīñ
zarūr dil se tumhāre hai silsila dil kā

bas itnī baat pe ham ne shikast kar lī qubūl
kisī ne de diyā chupke se vāsta dil kā

tum apne 'shād' se hargiz na bad-gumāñ honā
ki bad-gumānī se baḌhtā hai fāsla dil kā

dil sabhī kuchh zabān par laayā
ik faqat arz-e-mudda.ā ke sivā

lab suukh kyuuñ na jaa.eñ galā baiTh kyuuñ na jaa.e
dil meñ haiñ jo savāl uThāte raheñge ham

dukh ke safar pe dil ko ravāna to kar diyā
ab saarī umr haath hilāte raheñge ham

dil se kāñTā nikālne ke ba.ad
dard apnī kamī se duur huā

ik un kī haqīqat to mire dil ko hai taslīm
baaqī hai jo kaunain meñ vo sab nazarī hai

tere qadmoñ kī aahaT ko ye dil hai DhūñDtā har dam
har ik āvāz par ik thartharāhaT hotī jaatī hai

dil meñ rahnā hai pareshān ḳhayāloñ kā hujūm
aur āñkhoñ meñ qayāmat kā samāñ rahtā hai

rotā rahtā huuñ kisī ġham-zada ke rone par
aur dil-e-markaz-e-ālām jahāñ rahtā hai

zarā na mom huā pyaar kī harārat se
chaTaḳh ke TuuT gayā dil kā saḳht aisā thā