Tags-Dil

ahbāb kā shikva kyā kījiye ḳhud zāhir o bātin ek nahīñ
lab uupar uupar hañste haiñ dil andar andar rotā hai

ik barg-e-ḳhushk se gul-e-tāza tak aa ga.e
ham shahr-e-dil se jism ke sahrā tak aa ga.e

dil churānā ye kaam hai terā
le gayā hai to naam hai terā

dil jo is bazm meñ aatā hai to jaatā hī nahīñ
ek din dekhnā dīvāna huā rakkhā hai

merā dil kis ne liyā naam batā.ūñ kis kā
maiñ huuñ yā aap haiñ ghar meñ koī aayā na gayā

rañj pūchhā jo mohabbat meñ to rāhat samjhe
dukh uThāyā kabhī dil us se uThāyā na gayā

kab harārā dil-e-betāb kā rone se miTā
sho.ala-e-barq kabhī muñh se bujhāyā na gayā

qat.a jab se huī ummīd-e-visāl-e-jānāñ
is tarah baiTh gayā dil ki uThāyā na gayā

hajj-o-tīrath ko jaane se kyā fā.eda
gar buzurgoñ kā dil ham dukhāte rahe

mujh ko hai kho.e hue dil kī talāsh
aur vo kahte haiñ ki jaane do gayā

ḳhair hai kyuuñ is qadar betāb haiñ
hazrat-e-dil aap ko kyā ho gayā

un kī nazar se dil kī ye bahs ho rahī hai
kyā chiiz zindagī meñ maqsūd-e-zindagī hai

tirā dil nahīñ tire haath meñ mujhe dekh maiñ huuñ girafta-dil
mirā jabr merī najāt hai ye mire hunar kā kamāl hai

maiñ huuñ kam-talab tū hai kam-nazar maiñ navā-e-dil tū havā-e-dil
mirī dastaras meñ haiñ kul zamāñ tū asīr-e-lamha-e-hāl hai

vo hai naqd-e-zar tirī aarzū ye hai naqd-e-dil mirī aarzū
tirā naqd rizq-e-harām hai mirā naqd rizq-e-halāl hai

apnā dil sīna-e-ash.ār meñ rakh dete haiñ
kuchh haqīqat bhī zarūrī hai fasāne ke liye

haiñ terī anjuman meñ hameñ ik fasurda-dil
lekin hamīñ se anjuman-ārā.iyāñ bhī haiñ

be-fikr ho gayā huuñ dil-o-jāñ se is liye
us kī nigāh-e-nāz nigahbān ho ga.ī

shaffāf thā ye shīsha-e-dil us ke sāmne
bijlī kaḌak ke aap hī hairān ho ga.ī

bole vo kuchh aisī be-ruḳhī se
dil hī meñ rahā savāl apnā